ചിക്കാഗോ: അമേരിക്കയിലെ ചിക്കാഗോ സെന്റ് തോമസ് സീറോ മലബാർ രൂപതയുടെ ജൂബിലി ആഘോഷങ്ങളോട് അനുബന്ധിച്ച് നടക്കുന്ന ആഗോള കൺവെൻഷനിൽ പാലാ രൂപതയുടെ സ്നേഹാശംസകൾ നേർന്ന് പ്രോട്ടോസിഞ്ചെല്ലൂസ് (വികാരി ജനറാൾ) മോൺ. ഡോ. ജോസഫ് തടത്തിൽ സംസാരിച്ചു. ചിക്കാഗോയിലെ പ്രശസ്തമായ മക്കോർമിക് പ്ലേസ് (McCormick Place) കൺവെൻഷൻ സെന്ററിൽ ജൂലൈ 9 മുതൽ 12 വരെയാണ് വിപുലമായ രീതിയിൽ ജൂബിലി കൺവെൻഷൻ 2026 നടക്കുന്നത്.
കൺവെൻഷന്റെ ഭാഗമായി നടന്ന സാംസ്കാരിക സമ്മേളനത്തിലാണ് പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ടിന്റെയും രൂപതാംഗങ്ങളുടെയും പ്രതിനിധിയായി മോൺ. ഡോ. ജോസഫ് തടത്തിൽ ആശംസകൾ അർപ്പിച്ചത്. പ്രവാസി മലയാളി കത്തോലിക്കർ തങ്ങളുടെ വിശ്വാസ പാരമ്പര്യവും സാംസ്കാരിക പൈതൃകവും പുതുതലമുറയ്ക്ക് കൈമാറുന്നതിൽ ചിക്കാഗോ രൂപത വഹിക്കുന്ന പങ്കിനെ അദ്ദേഹം പ്രകീർത്തിച്ചു. രൂപതയുടെ വളർച്ചയ്ക്ക് അടിത്തറയിട്ട മാർ ജേക്കബ് അങ്ങാടിയത്തിന്റെയും നിലവിലെ നേതൃത്വത്തിന്റെയും ശുശ്രൂഷകളെ അദ്ദേഹം പ്രസംഗത്തിൽ അഭിനന്ദിച്ചു.
യൂണിവേഴ്സൽ ചർച്ചിന്റെ മാതൃകയിൽ, അമേരിക്കയിലെ വിവിധ ഭാഗങ്ങളിൽ നിന്നുള്ള ആയിരക്കണക്കിന് പ്രതിനിധികളാണ് ഈ ചരിത്ര കൺവെൻഷനിൽ പങ്കെടുക്കുന്നത്. ജൂബിലി ആഘോഷങ്ങളുടെ ഭാഗമായി വിശുദ്ധ കുർബാന, വചനപ്രഘോഷണങ്ങൾ, വിവിധ പ്രായക്കാർക്കായുള്ള സെമിനാറുകൾ, ആത്മീയ-സാംസ്കാരിക പരിപാടികൾ ഇവ സമ്മേളനത്തിലെ ഭാഗമാണ്
