2025 നവംബർ 29 ശനി 1199 വൃശ്ചികം 13
വാർത്തകൾ
🗞️👉 രാജ്യത്ത് ജിഡിപി ഉയര്‍ന്ന നിരക്കില്‍
2025ലെ രണ്ടാം പാദത്തില്‍ രാജ്യത്തെ മൊത്ത ആഭ്യന്തര ഉത്പാദനം ഉയര്‍ന്ന നിരക്കില്‍. ജിഡിപി 8.2 ശതമാനമായാണ് ഉയര്‍ന്നിരിക്കുന്നത്. കഴിഞ്ഞ ആറ് പാദങ്ങളിലെ ഏറ്റവും ഉയര്‍ന്ന നിരക്കാണിത്. ജിഎസ്ടി നിരക്ക് കുറച്ചതിന്റെ ഫലമായാണ് മൊത്ത ആഭ്യന്തര ഉത്പാദനം ഉയര്‍ന്നതെന്നാണ് കേന്ദ്രസര്‍ക്കാരിന്റെ അവകാശവാദം. നിര്‍മാണ മേഖലയില്‍ ഏഴ് ശതമാനത്തിന് മുകളിലുള്ള വളര്‍ച്ചാ നിരക്കാണ് രേഖപ്പെടുത്തിയിരിക്കുന്നത്. 9.1 ശതമാനമാണ് നിര്‍മാണ മേഖലയിലെ വളര്‍ച്ചാ നിരക്ക്. ബാങ്കിംഗ്, ഫിനാന്‍സ്, റിയല്‍ എസ്റ്റേസ്റ്റ് മേഖലകള്‍ നല്ല വളര്‍ച്ചാ നിരക്ക് നിലനിര്‍ത്തി. കാര്‍ഷിക അനുബന്ധ മേഖലയില്‍ 3.5 ശതമാനം വളര്‍ച്ചയും വൈദ്യുതി, ഗ്യാസ് മറ്റ് യൂട്ടിലിറ്റി മേഖല 4.4 ശതമാനവും വളര്‍ച്ച മാത്രമാണ് കൈവരിച്ചത്.
🗞️👉 കളമശ്ശേരിയിൽ ചരക്ക് ട്രെയിൻ എൻജിൻ പാളം തെറ്റി വൈദ്യുതി പോസ്റ്റിലിടിച്ചു; ഗതാഗതം പുനഃസ്ഥാപിച്ചു, ട്രെയിനുകൾ വൈകി
കളമശേരിയില്‍ ഷണ്ടിങ്ങിനിടെ ചരക്ക് ട്രെയിനിന്റെ എന്‍ജിന്‍ പാളം തെറ്റിയതിനെ തുടര്‍ന്ന് നിലച്ച ട്രെയിന്‍ ഗതാഗതം പുനഃസ്ഥാപിച്ചു. എഫ്എസിടിയിലെ ചരക്ക് കൊണ്ടുപോകുന്ന ട്രെയിന്റെ എഞ്ചിനാണ് നിയന്ത്രണം തെറ്റി ഇലക്ട്രിക് പോസ്റ്റില്‍ ഇടിച്ചത്. അപകടത്തെ തുടര്‍ന്ന് പല ട്രെയിനുകളും ഏറെ വൈകിയാണ് സ്റ്റേഷനുകളില്‍ എത്തിയത്. ഉച്ചയ്ക്ക് 2.30 ടെ കളമശേരിയില്‍ നിന്ന് സര്‍വീസ് തുടങ്ങുമ്പോഴായിരുന്നു അപകടം. ഷണ്‍ഡിങ് ചെയ്യുന്നതിനിടയില്‍ റെയില്‍ പാളം അവസാനിക്കുന്നതിനിടത്തുള്ള ബാരിക്കേഡ് മറികടന്ന് മുന്നോട്ട് പോയി ഇലക്ട്രിക് പോസ്റ്റില്‍ ഇടിച്ചാണ് പാളം തെറ്റിയത്. പിന്നാലെ തൃശൂരിലേക്കുള്ള റെയില്‍വേ ട്രാക്കില്‍ ഗതാഗതം നിലച്ചു. ഇതോടെ സംസ്ഥാനത്തെ ട്രെയിന്‍ ഗതാഗതം പൂര്‍ണ്ണമായി തളം തെറ്റി. ട്രെയിനുകള്‍ അരമണിക്കൂര്‍ മുതല്‍ ഒരു മണിക്കൂര്‍ വരെ വൈകി.
🗞️👉 ഫിഫ അറബ് കപ്പിന് തിങ്കളാഴ്ച കിക്കോഫ്
പതിനൊന്നാമത് ഫിഫ അറബ് കപ്പിന് ഖത്തര്‍ തലസ്ഥാനമായ ദോഹയില്‍ തിങ്കളാഴ്ച തുടക്കമാകും. ഉദ്ഘാടന ദിവസം രണ്ട് മത്സരങ്ങളാണുള്ളത്. ആദ്യമാച്ചില്‍ ടുണീഷ്യ സിറിയയെ നേരിടും. രണ്ടാം മത്സരത്തില്‍ ഖത്തര്‍ പലസ്തീനുമായി ഏറ്റുമുട്ടും. 2022 ഖത്തത്തര്‍ ലോക കപ്പില്‍ അര്‍ജന്റീനയും ഫ്രാന്‍സും തമ്മിലെ കലാശപോരിന് വേദിയായ ലുസെയില്‍ സ്റ്റേഡിയത്തിലാണ് അറബ് കപ്പിന്റെയും ഫൈനല്‍. അറബ് കപ്പ് മത്സരങ്ങള്‍ നടക്കുന്ന ആറ് വേദികളും ലോക കപ്പ് സമയത്ത് പരിശീലന മാച്ചുകളും മത്സരങ്ങളും നടന്ന സ്റ്റേഡിയങ്ങള്‍ തന്നെയാണ്. 16 ടീമുകളാണ് അറബ് കപ്പില്‍ മാറ്റുരക്കുന്നത്. നാലു ഗ്രൂപ്പുകളിലായി ആകെ 32 മത്സരങ്ങളായിരക്കും ഉണ്ടായിരിക്കുക. ഡിസംബര്‍ ഒമ്പത് വരെയാണ് ഗ്രൂപ്പ് പോരാട്ടങ്ങള്‍. തുടര്‍ന്ന് വരുന്ന നോക്കtuട്ട് മത്സരങ്ങള്‍ ഡിസംബര്‍ പതിനൊന്നിനായിരിക്കും തുടങ്ങുക.
🗞️👉 പത്തനംതിട്ട നഗരസഭയില്‍ ഒരു വീട്ടില്‍ 226 പേര്‍ക്ക് വോട്ട്; പരാതിയുമായി സിപിഐഎം
പത്തനംതിട്ട നഗരസഭയില്‍ ഒരു വീട്ടില്‍ 226 പേര്‍ക്ക് വോട്ട് എന്ന് സിപിഐഎം ആരോപണം. ഒന്നാം നമ്പര്‍ വാര്‍ഡിലെ ഒന്നാം നമ്പര്‍ വീട്ടിലാണ് ഇത്രയും പേര്‍ക്ക് വോട്ട്. തിരഞ്ഞെടുപ്പ് കമ്മീഷന് പരാതി നല്‍കുമെന്ന് സിപിഐഎം അറിയിച്ചു. നഗരസഭയിലെ ഒന്നാം പാര്‍ട്ടിയിലെ വോട്ടര്‍പട്ടികയില്‍ അടിമുടി ക്രമക്കേടെന്നാണ് സിപിഐഎം ആക്ഷേപം. ഒരു വീട്ടു നമ്പറില്‍ 226 പേര്‍ക്കാണ് വോട്ടര്‍ പട്ടികയില്‍ പേരുള്ളത്. വ്യത്യസ്ത മതത്തില്‍ പെട്ടവരുടെ പേരുകളാണ് ഒരു വീട്ടു നമ്പറില്‍ രേഖപ്പെടുത്തിയിരിക്കുന്നത്.ഒന്നാം വാര്‍ഡിലെ ഒന്നാം നമ്പര്‍ വീട് പൊളിച്ചു കളഞ്ഞു എന്നും നഗരസഭാ വോട്ടര്‍ പട്ടികയില്‍ വ്യാപക ക്രമക്കേടെന്നും സിപിഎം നേതാവ് പി ബി ഹര്‍ഷകുമാര്‍ ആരോപിച്ചു.
🗞️👉 സിദ്ധരാമയ്യ ഡി കെ ശിവകുമാറുമായി ഇന്ന് കൂടികാഴ്ച നടത്തും
മുഖ്യമന്ത്രി പദത്തെ ചൊല്ലി കര്‍ണാടക കോണ്‍ഗ്രസിലുണ്ടായ തര്‍ക്കം പരിഹരിക്കാന്‍ നാളെ ചര്‍ച്ച. മുഖ്യമന്ത്രി സിദ്ധരാമയ്യ, ഉപമുഖ്യമന്ത്രി ഡി കെ ശിവകുമാറുമായി കൂടികാഴ്ച നടത്തും. രാവിലെ ഒന്‍പത് മണിയ്ക്ക് മുഖ്യമന്ത്രിയുടെ വസതിയിലാണ് ചര്‍ച്ച. ദിവസങ്ങളായി നീണ്ടു നില്‍ക്കുന്ന തര്‍ക്കത്തിന് പരിഹാരം കാണാന്‍ ഹൈക്കമാന്‍ഡിന്റെ നിര്‍ദേശ പ്രകാരമാണ് ചര്‍ച്ച. തനിയ്ക്കും ഡി കെ ശിവകുമാറിനും അഭിപ്രായങ്ങള്‍ ഉണ്ടെന്നും എന്നാല്‍ അന്തിമ തീരുമാനം ഹൈക്കമാന്‍ഡ് എടുക്കുമെന്നും സിദ്ധരാമയ്യ. തര്‍ക്കം പരിഹരിയ്ക്കാന്‍ ഇരുനേതാക്കളെയും ഹൈക്കമാന്‍ഡ് ഡല്‍ഹിയ്ക്ക് വിളിപ്പിച്ചിരുന്നു. ഇതിന് മുന്നോടിയായാണ് കൂടികാഴ്ച. ഇതില്‍ ഇരുവരും ധാരണയിലെത്തുമെന്നാണ് സൂചന. പാര്‍ലമെന്റിന്റെ ശീതകാല സമ്മേളനം ആരംഭിയ്ക്കുന്നതിന് മുന്‍പ് കര്‍ണാടകയിലെ തര്‍ക്കം പരിഹരിയ്ക്കാനാണ് ഹൈക്കമാന്‍ഡ് നീക്കം.
🗞️👉 ലോകത്തിലെ ഏറ്റവും വലിയ ശ്രീരാമ പ്രതിമ ഗോവയില്‍ അനാച്ഛാദനം ചെയ്ത് പ്രധാനമന്ത്രി നരേന്ദ്രമോദി
ലോകത്തിലെ ഏറ്റവും വലിയ ശ്രീരാമ പ്രതിമ അനാച്ഛാദനം ചെയ്ത് പ്രധാനമന്ത്രി നരേന്ദ്രമോദി. ദക്ഷിണ ഗോവയിലെ ചരിത്രപ്രസിദ്ധമായ ശ്രീ സംസ്ഥാന്‍ ഗോകര്‍ണ്‍ ജീവോത്തം മഠത്തിലാണ് പ്രതിമ സ്ഥാപിച്ചിരിക്കുന്നത്. 77 അടിയോളം ഉയരമുള്ള വെങ്കല പ്രതിമ രാം സുതറാണ് രൂപകല്‍പ്പന ചെയ്തിരിക്കുന്നത്. മഠത്തിന്റെ 550ാം വാര്‍ഷികത്തിന് മുന്നോടിയായി സ്റ്റാമ്പും നാണയവും അദ്ദേഹം പുറത്തിറക്കി. അയോധ്യയിലെ രാമക്ഷേത്രത്തിന്റെ ധ്വജാരോഹണച്ചടങ്ങും പതാകയുയര്‍ത്തലും നടന്ന് ദിവസങ്ങള്‍ക്കുളളില്‍ത്തന്നെ ശ്രീരാമ പ്രതിമ രാജ്യത്തിന് സമര്‍പ്പിക്കാന്‍ സാധിച്ചതില്‍ അതിയായ സന്തോഷമുണ്ടെന്ന് മോദി പറഞ്ഞു.
🗞️👉 ഡിറ്റ് വാ ചുഴലിക്കാറ്റ്: ശ്രീലങ്കയില്‍ കനത്ത നാശനഷ്ടം
ഡിറ്റ് വാ ചുഴലിക്കാറ്റിനെ തുടര്‍ന്ന് ശ്രീലങ്കയില്‍ കനത്ത നാശനഷ്ടം. മഴയിലും മണ്ണിടിച്ചിലിലും 56 പേര്‍ മരിച്ചു. 21 പേരെ കാണാതായി. സൈന്യം രക്ഷാപ്രവര്‍ത്തനം തുടരുകയാണ്. ശ്രീലങ്കയ്ക്ക് എല്ലാവിധ സഹായങ്ങളും നല്‍കുമെന്ന് പ്രധാനമന്ത്രി നരേന്ദ്രമോദി അറിയിച്ചു. ചുഴലിക്കാറ്റിനെ തുടര്‍ന്ന് തമിഴ് നാട്, കേരളം, ആന്ധ്രാപ്രദേശ്, പുതുച്ചേരി, റായല്‍സീമ മേഖലകളില്‍ കനത്ത ജാഗ്രതാ നിര്‍ദേശം പുറപ്പെടുവിച്ചു. ഇന്ന് തമിഴ്‌നാട്ടിലെ നാല് ജില്ലകളിലും പുതുച്ചേരിയിലും റെഡ് അലര്‍ട്ട് പ്രഖ്യാപിച്ചു. ചെന്നൈ ഉള്‍പ്പെടെ 14 ജില്ലകളില്‍ ഓറഞ്ച് അലര്‍ട്ടാണ്.
🗞️👉 അരൂര്‍- തുറവൂര്‍ ഉയരപ്പാത നിര്‍മാണം: കരാര്‍ കമ്പനി അശോക ബില്‍ഡ്‌കോണിനെ താത്ക്കാലികമായി വിലക്കി ദേശീയപാതാ അതോരിറ്റി
അരൂര്‍- തുറവൂര്‍ ഉയരപ്പാത നിര്‍മാണത്തിന്റെ കരാര്‍ കമ്പനിയായ അശോക ബില്‍ഡ്‌കോണിനെതിരെ നടപടിയെടുത്ത് ദേശീയപാതാ അതോരിറ്റി.കരാറില്‍ ഏര്‍പ്പെടുന്നതില്‍ താല്‍ക്കാലിക വിലക്കേര്‍പ്പെടുത്തി. കമ്പനിക്കെതിരായ വിദഗ്ധ സമിതി അന്വേഷണം പൂര്‍ത്തിയാകുന്നത് വരെയാണ് വിലക്ക്. എന്‍എച്ച്66 ലെ അരൂര്‍ മുതല്‍ തുറവൂര്‍ വരെയുള്ള ആറ് വരി എലിവേറ്റഡ് കോറിഡോറിന്റെ നിര്‍മ്മാണത്തിനിടെയുണ്ടായ അപകടത്തെ തുടര്‍ന്നാണ് കരാര്‍ കമ്പനിക്കെതിരെ ദേശീയപാത അതോറിറ്റിയുടെ നടപടി.
🗞️👉 മുനമ്പം ഭൂസമരം അവസാനിക്കുന്നു; മറ്റന്നാള്‍ സമരം അവസാനിപ്പിക്കാന്‍ കോര്‍ കമ്മിറ്റി യോഗ തീരുമാനം
മുനമ്പത്ത് ഭൂമിയുടെ റവന്യു അവകാശങ്ങള്‍ക്കായി ഭൂസംരക്ഷണ സമിതി നടത്തുന്ന സമരം അവസാനിപ്പിക്കാന്‍ തീരുമാനം. മുനമ്പത്തുകാരില്‍ നിന്ന് നികുതി താല്‍ക്കാലികമായി സ്വീകരിക്കണമെന്ന് സംസ്ഥാന സര്‍ക്കാറിന് നിര്‍ദ്ദേശം നല്‍കിയതോടെ സമരത്തിന്റെ പ്രധാന ആവശ്യം യാഥാര്‍ഥ്യമായ സാഹചര്യത്തിലാണ് ഇന്ന് ചേര്‍ന്ന് കോര്‍ കമ്മിറ്റിയില്‍ സമരം അവസാനിപ്പിക്കാന്‍ തീരുമാനമായത്.
🗞️👉 തിരുവനന്തപുരം മെഡിക്കല്‍ കോളജില്‍ അജ്ഞാതന്റെ അതിക്രമം; നൈറ്റ് ഡ്യൂട്ടിയിലുള്ള വിദ്യാര്‍ഥികളെ കടന്ന് പിടിക്കാന്‍ ശ്രമിച്ചു; കത്രിക കൊണ്ട് ആക്രമിച്ചു
തിരുവനന്തപുരം മെഡിക്കല്‍ കോളജില്‍ വിദ്യാര്‍ഥികള്‍ക്ക് നേരെ അതിക്രമം. ഡയാലിസിസ് ടെക്‌നോളജി നാലാംവര്‍ഷ വിദ്യാര്‍ഥികള്‍ക്ക് നേരെയാണ് അജ്ഞാതന്റെ അതിക്രമമുണ്ടായത്. നൈറ്റ് ഡ്യൂട്ടിക്കിടെ പെണ്‍കുട്ടികളെ അജ്ഞാതന്‍ കടന്ന് പിടിക്കാന്‍ ശ്രമിച്ചുവെന്നാണ് പരാതി. വിദ്യാര്‍ഥികള്‍ മെഡിക്കല്‍ കോളജ് പ്രിന്‍സിപ്പലിന് പരാതി നല്‍കി. പരാതിയുടെ പകര്‍പ്പ് ട്വന്റിഫോറിന് ലഭിച്ചു.
