പാലാ രൂപതയുടെ പതിനാലാം പ്രസ്‌ബിറ്ററൽ കൗൺസിലിന്റെയും പാസ്റ്ററൽ കൗൺസിലിന്റെയും സംയുക്ത സമ്മേളനത്തിന് വാഗമണ്ണിൽ തുടക്കമായി. വാഗമൺ മൗണ്ട് നെബോ എപ്പാർക്കിയൽ റിട്രീറ്റ് സെന്ററിൽ വെച്ച് നടന്ന ചടങ്ങിൽ പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ട് സമ്മേളനം ഔദ്യോഗികമായി ഉദ്ഘാടനം ചെയ്തു.
രൂപതയുടെ മുന്നോട്ടുള്ള അജപാലന പ്രവർത്തനങ്ങൾക്കും സഭയുടെ സാമൂഹിക-സാംസ്കാരിക മേഖലകളിലെ സേവനങ്ങൾക്കും ദിശാബോധം നൽകുന്ന പ്രധാന വിഷയങ്ങൾ സമ്മേളനത്തിൽ ചർച്ച ചെയ്തു.
രാവിലെ 10.30-ന് ആരംഭിച്ച ഉദ്ഘാടന സമ്മേളനത്തിന് ശേഷം രൂപത നേരിടുന്ന ആനുകാലിക വിഷയങ്ങളെക്കുറിച്ച് കൗൺസിൽ അംഗങ്ങൾ വിശദമായി ചർച്ച നടത്തി. ഉച്ചകഴിഞ്ഞ് 3.00-ഓടെ പ്രത്യേക പ്രാർത്ഥനയോടെയാണ് ചടങ്ങുകൾ അവസാനിച്ചത്.
വാഗമൺ ധ്യാനകേന്ദ്രം ഡയറക്ടർ ഫാ. തോമസ് വാഴചാരിക്കൽ, പ്രസ്‌ബിറ്ററൽ കൗൺസിൽ സെക്രട്ടറി ഫാ. മാത്യു ആലപ്പാട്ടുമേടയിൽ, പാസ്റ്ററൽ കൗൺസിൽ ചെയർമാൻ ഡോ. വി.പി. ദേവസ്യാ, സെക്രട്ടറി അഡ്വ. സിജി ആന്റണി തെക്കേടത്ത് എന്നിവർ പരിപാടികൾക്ക് നേതൃത്വം നൽകി. രൂപതയിലെ 20 ഫൊറോനകളിൽ നിന്നുള്ള തിരഞ്ഞെടുക്കപ്പെട്ട അംഗങ്ങളും വൈദിക പ്രതിനിധികളുമാണ് സംയുക്ത സമ്മേളനത്തിൽ സംബന്ധിച്ചത്.
