സെക്രട്ടറിയേറ്റ് പടിക്കലിൽ എൽ.പി.എസ്.ടി (LPST) ഉദ്യോഗാർത്ഥികൾ നടത്തിവന്ന സമരം പിൻവലിച്ചു. പൊതുവിദ്യാഭ്യാസ മന്ത്രി എൻ. ഷംസുദീനുമായി നടത്തിയ വിജയകരമായ ചർച്ചയെ തുടർന്നാണ് സമരം അവസാനിപ്പിക്കാൻ റാങ്ക് ഹോൾഡേഴ്സ് തീരുമാനിച്ചത്. 37 ദിവസമായി തുടർന്നുപോന്ന സമരത്തിനാണ് ഇതോടെ പരിസമാപ്തിയായത്.
രാവിലെ 10:30-ന് പൊതുവിദ്യാഭ്യാസ മന്ത്രിയുടെ ചേമ്പറിലായിരുന്നു നിർണായകമായ ചർച്ച നടന്നത്. സെക്രട്ടറിയേറ്റിന് മുന്നിലെ സമരം കൂടുതൽ കടുപ്പിക്കുന്ന സാഹചര്യത്തിലാണ് സർക്കാർ മുൻകൈയെടുത്ത് റാങ്ക് ഹോൾഡേഴ്സിനെ ചർച്ചയ്ക്ക് ക്ഷണിച്ചത്. ചർച്ചയെ തുടർന്ന് നിരാഹാര സമരം അനുഷ്ഠിച്ചു വന്നിരുന്ന എസ്. വളർമതി സമരം അവസാനിപ്പിച്ചു.
അധ്യാപക-വിദ്യാർത്ഥി അനുപാതം കുറയ്ക്കുക, പുതിയ തസ്തികകൾ സൃഷ്ടിക്കുക, എയ്ഡഡ് സ്കൂൾ നിയമനങ്ങൾ പി.എസ്.സിക്ക് വിടുക തുടങ്ങിയ ആവശ്യങ്ങളുന്നയിച്ചായിരുന്നു ഉദ്യോഗാർത്ഥികളുടെ പ്രതിഷേധം. സമരം തുടങ്ങിയതിനുശേഷം ഇതാദ്യമായാണ് സർക്കാർ മുൻകൈയെടുത്ത് ഉദ്യോഗാർത്ഥികളെ ചർച്ചയ്ക്ക് വിളിക്കുന്നത്. ഇതിനുമുമ്പ് സമരസമിതി ഏഴു തവണ സർക്കാരിനെ കണ്ട് നിവേദനം നൽകിയിരുന്നു.
