പാലാ: എൻജിനീയറിങ് പ്രവേശന പരീക്ഷയ്ക്ക് (KEAM) തയ്യാറെടുക്കുന്ന വിദ്യാർത്ഥികൾക്കായി പാലാ സെന്റ് ജോസഫ്സ് കോളേജ് ഓഫ് എൻജിനീയറിങ് ആൻഡ് ടെക്നോളജി സംഘടിപ്പിക്കുന്ന സൗജന്യ കോച്ചിംഗ് ക്ലാസുകൾക്ക് തുടക്കമായി. വിദ്യാർത്ഥികൾക്ക് ഉപരിപഠന മേഖലയിൽ കൂടുതൽ കരുത്തുപകരാൻ ലക്ഷ്യമിട്ട് ആരംഭിച്ച ഈ പ്രത്യേക പരിശീലന പരിപാടിയുടെ ഉദ്ഘാടനം കോളേജ് ക്യാമ്പസിൽ വച്ച് നടന്നു.
തികച്ചും സൗജന്യമായാണ് പരിശീലനം നൽകുന്നത്. പരീക്ഷാ തയ്യാറെടുപ്പിന് ആവശ്യമായ പഠന സാമഗ്രികളും (Study Materials) വിദ്യാർത്ഥികൾക്ക് ചടങ്ങിൽ സൗജന്യമായി വിതരണം ചെയ്തു. വരും ദിവസങ്ങളിൽ കൃത്യമായ ഷെഡ്യൂൾ അനുസരിച്ച് ഓൺലൈൻ പ്ലാറ്റ്ഫോമുകൾ വഴിയാണ് ക്ലാസുകൾ തുടരുക. പരിചയസമ്പന്നരായ അധ്യാപകരാണ് വിവിധ വിഷയങ്ങളിൽ പരിശീലനത്തിന് നേതൃത്വം നൽകുന്നത്.
സംസ്ഥാനത്തെ മിടുക്കരായ വിദ്യാർത്ഥികൾക്ക് എൻട്രൻസ് പരീക്ഷയിൽ മികച്ച റാങ്ക് കൈവരിക്കാനും ഉന്നതവിദ്യാഭ്യാസത്തിന് അവരെ പ്രാപ്തരാക്കാനും വേണ്ടിയാണ് കോളേജ് ഇത്തരമൊരു മാതൃകാപരമായ പദ്ധതി തുടർന്നു വരുന്നതെന്ന് കോളേജ് ചെയർമാൻ മോൺ. ഡോ. ജോസഫ് തടത്തിൽ പ്രസ്താവിച്ചു.
ഡയറക്ടർ റവ. പ്രൊഫ. ഡോ. ജയിംസ് ജോൺ മംഗലത്ത്, പ്രിൻസിപ്പൽ പ്രൊഫ. ഡോ. വി. പി. ദേവസ്യ, വൈസ് പ്രിൻസിപ്പൽ റവ. ഡോ. ജോസഫ് പുരയിടത്തിൽ, ബർസാർ റവ. ഡോ. ജോർജ് കാരാംവേലിൽ, ക്യാംപസ് കോർഡിനേറ്റർ റവ. ഫാ. ജോൺ മറ്റമുണ്ടയിൽ, അഡ്മിഷൻ സെൽ കോർഡിനേറ്റർ പ്രൊഫ. ഡോ. ജ്യോതിസ് തോമസ്, കൺട്രോളർ ഓഫ് എക്സാമിനേഷൻസ് പ്രൊഫ. ഡോ. നിതീഷ് മാത്യു നിധീരി, അക്കാദമിക്സ് ഡീൻ ഡോ. ജോർജ് ടോം വർഗീസ്, ശ്രീ ബിനോ തോമസ് തുടങ്ങിയവർ പരിപാടികൾക്ക് നേതൃത്വം നൽകി. വിവിധ വകുപ്പ് മേധാവികളും അധ്യാപകരും വിദ്യാർത്ഥികളും ചടങ്ങിൽ പങ്കെടുത്തു.
