പാലാ : ക്രിസ്ത്യൻ പിന്നോക്കാവസ്ഥയെപ്പറ്റി പഠിച്ച് നടപടികൾ ശുപാർശ ചെയ്യുന്നതിനായി നിയോഗിച്ച ജസ്റ്റിസ് ജെ. ബി. കോശി കമ്മീഷൻ റിപ്പോർട്ട് പുറത്തു വിടാനുള്ള സർക്കാർ തീരുമാനത്തെ സ്വാഗതം ചെയ്യുന്നതായി കത്തോലിക്കാ കോൺഗ്രസ് പാലാ രൂപതാ സമിതി.വർഷങ്ങൾക്കു മുമ്പ് സമർപ്പിച്ച റിപ്പോർട്ട് പ്രിസിദ്ധീകരിക്കാത്തതിനെതിരെ കത്തോലിക്കാ കോൺഗ്രസ് നിരവധി പ്രക്ഷോഭങ്ങളും സമരപരിപാടികളും നടത്തിയിരുന്നു.
ഗ്ലോബൽ സമിതിയുടെ നേതൃത്വത്തിൽ കാസർഗോഡ് മുതൽ തിരുവനന്തപുരം വരെ നടത്തിയ അതിജീവന യാത്രയിലെ ഒരു പ്രധാന ആവശ്യം റിപ്പോർട്ട് പുറത്തുവിടുക എന്നതായിരുന്നു.റിപ്പോർട്ട് പ്രസിദ്ധീകരിക്കാനുള്ള തീരുമാനം അഭിനന്ദനം അർഹിക്കുന്നതാണന്നും അതിലെ ശിപാർശകൾ എല്ലാം സമയ ബന്ധിതമായി നടപ്പിലാക്കണമെന്നും കത്തോലിക്കാ കോൺഗ്രസ് പാലാ രൂപത സമിതി അഭിപ്രായപ്പെട്ടു.
രൂപതാ പ്രസിഡൻറ് ഇമ്മാനുവൽ നിധീരി അധ്യക്ഷത വഹിച്ച യോഗത്തിൽ ഡയറക്ടർ റവ. ഡോ. ജോർജ് വർഗീസ് ഞാറക്കുന്നേൽ, ജോസ് വട്ടുകുളം, ജോയി കണിപ്പറമ്പിൽ, ആൻസമ്മ സാബു, അഡ്വ. ജോൺസൺ വീട്ടിയാങ്കൽ, പയസ് കവളമാക്കൽ,സിന്ധു ജയിബു,സാബു പൂണ്ടിക്കുളം, ടോമി കണ്ണിറ്റുമ്യാലിൽ, ബെന്നി കിണറ്റുകര, രാജേഷ് പാറയിൽ, ജോബിൻ പുതിയടത്ത് ചാലിൽ , എഡ്വവിൻ പാമ്പാറ, ലിബി മണിമല തുടങ്ങിയവർ സംസാരിച്ചു.
