കടുത്തുരുത്തി: പ്രശസ്ത തീർത്ഥാടന കേന്ദ്രമായ കടുത്തുരുത്തി വലിയപള്ളിയിൽ (സെന്റ് മേരീസ് ഫോറോന പള്ളി) ഈ വർഷത്തെ മൂന്നുനോമ്പ് തിരുനാളിന് നാളെ തുടക്കമാകും. മൂന്നുനോമ്പാചരണം, പുറത്ത് നമസ്കാരം, മുത്തിയമ്മയുടെ ദർശന തിരുനാൾ എന്നിവ ജനുവരി 29 വരെ നീണ്ടുനിൽക്കുന്ന വിവിധ ചടങ്ങുകളോടെ ആഘോഷിക്കുമെന്ന് വികാരി റവ. ഡോ. ജോൺസൺ നീലനിരപ്പേൽ വാർത്താസമ്മേളനത്തിൽ അറിയിച്ചു.
ഇന്ന് സന്ധ്യാകണ്വൻഷൻ
തിരുനാളിന് മുന്നൊരുക്കമായി ഇന്ന് (ശനി) വൈകുന്നേരം 5-ന് വിശുദ്ധ കുർബാനയും തുടർന്ന് ഫാ. ബിനോയി കരിമരുതിങ്കൽ (PDM) നയിക്കുന്ന സായാഹ്ന ബൈബിൾ കൺവെൻഷനും നടക്കും.
പ്രധാന ചടങ്ങുകൾ ഒറ്റനോട്ടത്തിൽ:
- നാളെ (ഞായർ): രാവിലെ 6.45-ന് വികാരി റവ. ഡോ. ജോൺസൺ നീലനിരപ്പേൽ കൊടിയേറ്റം നിർവ്വഹിക്കും. തുടന്ന് ലദീഞ്ഞ്, പാട്ടുകുർബാന, വിശുദ്ധ കുർബാന എന്നിവ നടക്കും.
- തിങ്കളാഴ്ച: രാവിലെ 7-ന് അതിരൂപതയിലെ നവവൈദികർ അർപ്പിക്കുന്ന സമൂഹബലി. വൈകുന്നേരം 5.30-ന് വിശുദ്ധ യൂദതദ്ദേവൂസിന്റെ കപ്പേളയിൽ നിന്ന് പ്രദക്ഷിണം ആരംഭിച്ച് പള്ളിയിൽ പ്രവേശിക്കും. രാത്രി 7.15-ന് മെഴുകുതിരി പ്രദക്ഷിണമായി മുത്തിയമ്മയുടെ തിരുസ്വരൂപം ലൂർദ് ഗ്രോട്ടോയിൽ പ്രതിഷ്ഠിക്കും.
- ചൊവ്വാഴ്ച (പ്രധാന ചടങ്ങുകൾ): രാത്രി 7-ന് ലൂർദ് കപ്പേളയിൽ നിന്ന് മുത്തിയമ്മയുടെ തിരുസ്വരൂപം വഹിച്ചുള്ള പ്രദക്ഷിണം വലിയപള്ളിയിലെത്തും. 8.30-ന് കരിങ്കൽ കുരിശിൻ ചുവട്ടിലെ പ്രതിഷ്ഠയ്ക്ക് ശേഷം സീറോ മലബാർ സഭ മേജർ ആർച്ച് ബിഷപ്പ് മാർ റാഫേൽ തട്ടിൽ സന്ദേശം നൽകും.
- പുറത്ത് നമസ്കാരം: ചൊവ്വാഴ്ച രാത്രി 9-ന് ആരംഭിക്കുന്ന പുറത്ത് നമസ്കാര ശുശ്രൂഷകൾക്ക് കോട്ടയം അതിരൂപത മെത്രാപ്പോലീത്ത മാർ മാത്യു മൂലക്കാട്ട് മുഖ്യകാർമ്മികത്വം വഹിക്കും. സഹായ മെത്രാന്മാരായ മാർ ജോസഫ് പണ്ടാരശ്ശേരിൽ, ഗീവർഗീസ് മാർ അപ്രേം തുടങ്ങിയവർ സഹകാർമ്മികരാകും.
- ബുധനാഴ്ച: രാവിലെ 10-ന് തിരുനാൾ റാസ, പ്രദക്ഷിണം. തുടർന്ന് 1.30-ന് ആശീർവാദം.
- വ്യാഴാഴ്ച (സമാപനം): പൂർവ്വികർക്കായുള്ള ബലിയർപ്പണവും സെമിത്തേരി സന്ദർശനവും.
തിരുനാളിനായുള്ള എല്ലാ ഒരുക്കങ്ങളും പൂർത്തിയായതായി പള്ളി ഭാരവാഹികൾ അറിയിച്ചു. വാർത്താസമ്മേളനത്തിൽ വികാരിയോടൊപ്പം കൈക്കാരന്മാരായ ജോയി മണലേൽ, ജിയോ കുന്നശ്ശേരിൽ, ബിജു പൂവക്കോട്ടിൽ, പ്രസുദേന്തി ജോയി മണലേൽ എന്നിവരും പങ്കെടുത്തു.
