വാഗമൺ : പുരാതനവും പ്രകൃതിരമണിയവും ചരിത്ര പ്രസിദ്ധവുമായ വാഗമൺ കുരിശുമലയിലെ കുരിശുമല കയറ്റവും പുതുഞായർ തിരുനാളും 24 മുതൽ ഏപ്രിൽ 23 വരെ തീയതികളിൽ ആഘോഷിക്കും. നോമ്പിലെ എല്ലാ വെള്ളിയാഴ്ചകളിലും കല്ലില്ലാകവലയിൽ നിന്നും കുരിശുമലയിലേക്ക് കുരിശിന്റെ വഴിയും തുടർന്ന് മലമുകളിൽ വിശുദ്ധ കുർബാനയും നേർച്ചക്കഞ്ഞി വിതരണവും ഉണ്ടായിരിക്കും.
നോമ്പിലെ ആദ്യ വെള്ളിയായ ഇന്ന് രാവിലെ കല്ലില്ലാക്കവലയിൽനിന്നും ആരംഭിക്കുന്ന സ്ലീവാ പാതയ്ക്ക്‌ പെരിങ്ങുളം , ശാന്തിഗിരി ഇടവകകൾ നേതൃത്വം നൽകും. 10ന് മലമുകളിൽ ഫാ. മാത്യു പാറത്തൊട്ടി വിശുദ്ധ കുർബാനയർപ്പിച്ച് സന്ദേശം നൽകും. തുടർന്നുള്ള വെള്ളിയാഴ്ചകളിൽ വിവിധ ഇടവകകൾ കുരിശിന്റെ വഴിക്കു നേതൃത്വം നൽകും. നാല്പതാം വെള്ളിയാഴ്ച ആഘോഷമായ കുരിശിന്റെ വഴിക്കു ശേഷം മാർ ജേക്കബ് മുരിക്കൻ മലമുകളിൽ വിശുദ്ധ കുർബാനയർപ്പിച്ചു സന്ദേശം നൽകും.
ദുഃഖവെള്ളി രാവിലെ 6.30നു നേർച്ചക്കഞ്ഞി വിതരണം ആരംഭിക്കും. 7.30ന് ദുഃഖവെള്ളി തിരുക്കർമ്മങ്ങൾ കല്ലില്ലാകവല സെന്റ് തോമസ് പള്ളിയിൽ, ഒമ്പതിന് കല്ലില്ലാകവലയിൽ നിന്ന് സ്ലീവാ പാത,10.30ന് പീഡാനുഭവ സന്ദേശം, സമാപന ശുശ്രുഷയ്ക്ക് മലമുകളിൽ പാലാ രൂപത വികാരി ജനറാൾ മോൺ. ജോസഫ് കണിയോടിക്കൽ മുഖ്യകാർമികത്വം വഹിക്കും. ഏപ്രിൽ 14ന് വൈകുന്നേരം 5.30ന് പുതുഞായർ തിരുനാൾ കോടിയേറും. ഏപ്രിൽ 23ന് ഏട്ടാമിടത്തോടെ സമാപിക്കും.
വൈദികരുടെ നേതൃത്വത്തിൽ വരുന്ന തീർഥാടക സംഘങ്ങൾക്കു മലമുകളിൽ വിശുദ്ധ കുർബാനയർപ്പിക്കാൻ സൗകര്യമുണ്ട്. മലയടിവാരത്തിൽ എല്ലാവിധ വാഹനങ്ങൾക്കും വിപുലമായ പാർക്കിംഗുമുണ്ട്.
ഇവിടുത്തെ ലഘുഭക്ഷണ ശാലയിൽ നിന്നും മിതമായ നിരക്കിൽ ഭക്ഷണവും തീർഥാടകർക്കു ലഭിക്കും. നാൽപതാം വെള്ളി മുതൽ ഈസ്റ്റർ ദിനം വരെ രാത്രി മല കയറുന്നതിനു ലൈറ്റ് സൗകര്യം ഏർപ്പെടുത്തും. രാവിലെ എട്ടു മുതൽ വൈകുന്നേരം അഞ്ചു വരെയാണ് മലകയറുന്നതിനുള്ള സൗകര്യമെന്ന് വാഗമൺ പള്ളി വികാരി ഫാ. ആന്റണി വാഴയിൽ അറിയിച്ചു.
വാർത്തകൾക്കായി പാലാ വിഷന്റെ കമ്മ്യൂണിറ്റിയിൽ അംഗമാകുക
https://chat.whatsapp.com/LaaDUaR3VUGFfezf7dx3Em
👉 visit our website pala.vision
