മീനച്ചിൽ താലൂക്കിന്റെ
സിരാകേന്ദ്രമായ പാലായുടെ സമീപപ്രദേശമായ അരുണാപുരം സെന്റ് തോമസ് പള്ളിക്ക് ഇനി പുതിയ മുഖം .
42 വർഷങ്ങൾക്ക് മുൻപ് സ്ഥാപിതമായ അരുണാപുരം സെന്ററിന്റെ ഉദ്ഘാടനം 1983 ഒക്ടോബർ 23-ാം തീയതി സെൻറ് തോമസ് കോളേജ് ചാപ്പലിൽ ദിവ്യബലി അർപ്പിച്ച് അഭിവന്ദ്യ മാർ ജോസഫ് പള്ളിക്കാപ്പറമ്പിൽ പിതാവ് നിർവ്വഹിച്ചു. വിവിധ വിദ്യാഭ്യാസ സ്ഥാപനങ്ങളാലും, സന്യാസ സമൂഹങ്ങളാലും സമ്പന്നമായ അരുണാപുരം, ക്രൈസ്തവ കേന്ദ്രമായതോടെ ഒരിടവകയെപ്പറ്റി അഭിവന്ദ്യ പിതാവ് ചിന്തിച്ചു തുടങ്ങി. അദ്ദേഹത്തിൻ്റെ
ആഗ്രഹത്താൽ,സെന്റ് തോമസ് കോളേജ് കോമ്പൗണ്ടിനോട് ചേർന്നുള്ള രൂപതയുടെ സ്ഥലത്തിൽ നിന്ന് 1 ഏക്കർ 49 സെന്റ് സ്ഥലം അഭിവന്ദ്യ മാർ ജോസഫ് പള്ളിക്കപറമ്പിൽ പിതാവ് താല്പര്യമെടുത്ത് സെന്ററിനു നൽകി. 42 വർഷങ്ങൾ കൊണ്ട് വളർന്ന്, രൂപതയിലെ ശ്രദ്ധിക്കപ്പെടുന്ന ഒരു ഇടവകയായി അരുണാപുരം സെൻ തോമസ് ചർച്ച് ഇന്ന് മുന്നേറുന്നു. ഈ കാലയളവിൽ അർപ്പണബോധത്തോടും, ത്യാഗ മനോഭാവത്തോടെയും ഇടവകയിൽ സേവനം ചെയ്ത എല്ലാവരെയും പ്രത്യേകമായി ആത്മീയ ഗുരുക്കന്മാരായിരുന്ന എല്ലാ വൈദികരേയും നന്ദിയോടെ ഓർക്കുന്നു.
രൂപതയുമായി അതിർത്തി പങ്കിട്ട് ടൗണിൽ തന്നെ സ്ഥിതിചെയ്യുന്ന ഈ ഇടവകയിൽ ആത്മീയ ചൈതന്യം നിറഞ്ഞുനിൽക്കുന്ന മനോഹരമായ ദൈവാലയവും, മാതാവിന്റെ ഗ്രോട്ടോയും, ഏറെ സൗകര്യങ്ങൾ ഉള്ള വിശാലമായ പാർക്കിംഗ് ഗ്രൗണ്ടും, 850-ൽ പരം ആളുകൾക്ക് ഒന്നിച്ച് ഭക്ഷണം കഴിക്കാൻ സാധിക്കുന്ന പാരിഷ് ഹാളും, ഇടവകയ്ക്ക് പുറമേയുള്ള ജനങ്ങളെയും ഇവിടേക്ക് ആകർഷിക്കുന്നു. രൂപതയുടെ വിവിധ സ്ഥാപനങ്ങളും, 11 സന്യാസഭവനങ്ങളും, അവരുടെ വ്യത്യസ്തങ്ങളായ ശുശ്രൂഷ സ്ഥാപനങ്ങളും ഈ ഇടവകയിൽ ഉണ്ട് എന്നത് ഇടവകയ്ക്ക് എന്നും വലിയ കരുത്താണ്.
കേരളത്തിലെ തന്നെ പ്രമുഖ വിദ്യാഭ്യാസ ഹബ്ബ് ആയി മാറിയിരിക്കുന്ന നമ്മുടെ പ്രദേശത്ത് പഠനത്തിനായി എത്തിയിരിക്കുന്ന ആയിരകണക്കിന് വിദ്യാർത്ഥികൾക്ക് ഞായറാഴ്ച ദിവസം
വിശുദ്ധ കുർബ്ബാനയിൽ സംബന്ധിക്കാനുള്ള സ്ഥലപരിമിതിയും,
തുടർച്ചയായ പ്രളയജലഭീഷണി കൊണ്ട് കേടുപാടുകൾ വന്നു കൊണ്ടിരിക്കുന്ന ദൈവാലയത്തിൻ്റെ അൾത്താരയും മറ്റ് ഭാഗങ്ങളും നവീകരിക്കണമെന്ന ചിന്തയും, ഇടവകജനം ഒന്നു ചേർന്ന് ഏറ്റെടുത്തു .
രൂപതയിൽ നിന്നും ഇതിനുള്ള അംഗീകാരം കിട്ടിയ മുറയ്ക്ക്, ചുരുങ്ങിയ മാസങ്ങൾ കൊണ്ട് ഇടവക ദേവാലയത്തിൻ്റെ അൾത്താര പുതുക്കി പണിയുകയും, ഉൾഭിത്തികളും,മോണ്ടളവും കൂടുതൽ മനോഹരമാക്കുയും ചെയ്തു. കൂടുതൽ വിശ്വാസികളെ ഉൾകൊള്ളിക്കുന്നതിനായി, ഇരുവശങ്ങളിലേയ്ക്കും ദൈവാലയത്തിൻ്റെ മനോഹാരിത നഷ്ടപ്പെടുത്താതെ 14 അടി വീതിയിൽ ഈ ദൈവാലായത്തിന്റെ വിസ്തൃതിയും വർദ്ധിപ്പിച്ചു. ചുരുങ്ങിയ സമയo കൊണ്ട് നിർമ്മാണം പൂർത്തികരിക്കുന്നതിനും, വ്യത്യസ്തത പുലർത്തുന്നതിനുമായി
കേരളത്തിലെ 100 കണക്കിന് ദൈവാലയങ്ങളിലെ നിർമ്മാണ പ്രവർത്തനങ്ങൾക്ക് നേതൃത്വം നൽകി കൊണ്ടിരിക്കുന്ന പ്രമുഖ രണ്ട് ആർക്കിടെക്ചർ കമ്പിനകളായ നെസ്റ്റ് ഹൈടെക്ക് ഇൻറീരിയർ ഉടമയായ ഷിജു ഭാസ്കരും, മേരിമാതാ ആർട്ട് സ്റ്റുഡിയോ ഉടമയായ ജോഷിയും ചേർന്നാണ് ഇതിന്റ നിർമ്മാണം പൂർത്തികരിച്ചത്. ദൈവാലയത്തിൻ്റെ പുനർനിർമ്മാണത്തിനായുള്ള മുഴുവൻ പണവും ഇടവക സമൂഹത്തിൽ നിന്നും യാതൊരു മടിയും കൂടാതെ ലഭിച്ചതാണ് ഏറ്റവും വലിയ ദൈവാനുഗ്രഹമെന്ന് ബഹു.വികാരി അറിയിച്ചു.
നവംബർ 30-ാം തീയതി രാവിലെ 7.30 -ന് പാലാ രൂപത മെത്രാൻ അഭിവന്ദ്യ മാർ. ജോസഫ് കല്ലറങ്ങാട്ട് ഈ നവീകരിച്ച ദൈവാലയത്തിന്റെ ആശീർവാദ കർമ്മം നിർവ്വഹിക്കും. വികാരി റവ. ഫാ. അബ്രാഹം കുപ്പ പുഴയ്ക്കൽ, അസി.വികാരി റവ. ഫാ. തോമസ് മധുരംപുഴ, കൈക്കാരൻമാരായ ജേക്കബ് ഇറ്റയ്ക്കുന്നേൽ, ജോയി ഒഴുകയിൽ, ഫ്രാൻസിസ് പാലയ്ക്കാട്ടുക്കുന്നേൽ, പള്ളി കമ്മിറ്റി അംഗങ്ങൾ, വിവിധ കമ്മിറ്റി അംഗങ്ങൾ, ഭക്തസംഘടനാംഗങ്ങൾ എന്നിവർ പരിപാടികൾക്ക് നേതൃത്വം നൽകും .
