ജീവന്റെ പ്രഘോഷണവുമായി മാഡ്രിഡ് തെരുവുകളെ ഇളക്കി മറിച്ച് പ്രോലൈഫ് സംഘടനകളുടെ റാലി
മാഡ്രിഡ്: സ്പെയിന്റെ തലസ്ഥാനമായ മാഡ്രിഡില്‍ മനുഷ്യ ജീവനു ഭീഷണിയായ നിയമങ്ങള്‍ക്കെതിരെ പ്രോലൈഫ് സംഘടനകളുടെ കൂട്ടായ്മയായ ‘യെസ് റ്റു ലൈഫ്’ സംഘടിപ്പിച്ച റാലിയില്‍ ആയിരങ്ങളുടെ പങ്കാളിത്തം. ജീവന്റെ നിലനില്‍പ്പിനുള്ള ഭീഷണികളെയും, അതുമായി ബന്ധപ്പെട്ട കച്ചവടങ്ങളെയും നിലനിര്‍ത്തുന്ന നിയമങ്ങളും, വീടുവീഴ്ചകളും തള്ളിക്കളയണമെന്ന ആവശ്യവുമായിട്ടായിരുന്നു റാലി. അഞ്ഞൂറിലധികം പ്രോലൈഫ് സംഘടനകളുടെ കൂട്ടായ്മയായ ‘യെസ് റ്റു ലൈഫ്’ മാര്‍ച്ച് 25-ന് നടത്തുവാനിരിക്കുന്ന ‘ഇന്റര്‍നാഷണല്‍ ഡേ ഓഫ് ലൈഫ്’ന് മുന്നോടിയായി നടന്ന റാലിയില്‍, “ഒരേസമയം കത്തോലിക്കനും, ഭ്രൂണഹത്യ നടത്തുന്ന വ്യക്തിയുമാകാന്‍ സാധിക്കില്ല”, “എല്ലാ ജീവനും ദൈവത്തിന്റെ അനുഗ്രഹമാണ്”, “മനുഷ്യാവകാശങ്ങള്‍ ഗര്‍ഭാശയത്തില്‍ നിന്നും തുടങ്ങുന്നു” തുടങ്ങിയ മുദ്രാവാക്യങ്ങള്‍ എഴുതിയ ബാനറുകളുമായിട്ടായിരുന്നു പ്രോലൈഫ് പ്രവര്‍ത്തകര്‍ പങ്കെടുത്തത്.
“ഏതു സമയത്തും, സാഹചര്യത്തിലും ജീവിക്കുവാനും അര്‍ഹിക്കുന്ന അന്തസ്സോടെ പരിഗണിക്കപ്പെടുവാനും ഗര്‍ഭധാരണം മുതല്‍ സ്വാഭാവിക മരണം വരെ മനുഷ്യര്‍ക്ക് അവകാശമുണ്ടെന്ന” പ്രഖ്യാപന പത്രികയും റാലിയില്‍ വായിച്ചു. മനുഷ്യ ജീവന്റെ ജൈവ ശാസ്ത്രപരമായ സത്യം മറച്ചുവെക്കപ്പെടരുതെന്ന് ആവശ്യപ്പെടുന്ന പത്രികയില്‍ ഭ്രൂണഹത്യ, ദയാവധം, മരണസംസ്കാരം വഴി കുത്തിവെക്കുന്ന അനീതിക്കെതിരേയും ശബ്ദമുയര്‍ത്തുന്നുണ്ട്. എത്രത്തോളം ബുദ്ധിമുട്ടുകള്‍ നേരിട്ടാലും മനുഷ്യജീവന് വേണ്ടി പ്രവര്‍ത്തിക്കുന്ന സമൂഹത്തിലെ വിവിധ തുറകളില്‍ നിന്നുള്ള ആളുകളെ തങ്ങള്‍ പിന്തുണക്കുന്നുവെന്നും, അവര്‍ക്ക് നന്ദി പറയുന്നുവെന്നും പറഞ്ഞുകൊണ്ടാണ് പത്രിക അവസാനിക്കുന്നത്. അള്‍ട്രാസൗണ്ടില്‍ നിന്നുള്ള ഒരു കുരുന്നു ജീവന്റെ ഹൃദയമിടിപ്പിന്റെ ശബ്ദം കേട്ട ഒരു നിമിഷത്തെ നിശബ്ദതക്ക് ശേഷം ആകാശത്തേക്ക് ബലൂണുകള്‍ പറത്തികൊണ്ടായിരുന്നു റാലിയുടെ സമാപനം.
വാർത്തകൾക്കായി പാലാ വിഷന്റെ കമ്മ്യൂണിറ്റിയിൽ അംഗമാകുക
https://chat.whatsapp.com/LaaDUaR3VUGFfezf7dx3Em
👉 visit our website pala.vision
