പാലാ: ശരത് പവാർ നേതൃത്വം നൽകുന്ന നാഷണലിസ്റ്റ് കോൺഗ്രസ് പാർട്ടിയുടെ (NCP-S) കോട്ടയം ജില്ലാ നേതൃത്വ പരിശീലന ക്യാമ്പ് 2025 ഒക്ടോബർ 18, 19 (ശനി, ഞായർ) തീയതികളിൽ പാലായ്ക്ക് സമീപമുള്ള ഇടമറ്റത്തെ ഓശാന മൗണ്ട് ക്യാമ്പ് സൈറ്റിൽ വച്ച് നടക്കും. ജാതി-മത-വർഗ്ഗീയ ശക്തികൾ രാജ്യത്ത് ശക്തി പ്രാപിക്കുന്ന സാഹചര്യത്തിലാണ് ക്യാമ്പ് നടക്കുന്നത് എന്നത് ശ്രദ്ധേയമാണ്.
ഉദ്ഘാടനവും ക്ലാസ്സുകളും
ഒക്ടോബർ 19 ഞായറാഴ്ച രാവിലെ 10 മണിക്ക് ജില്ലാ പ്രസിഡൻ്റ് ബെന്നി മൈലാടൂരിൻ്റെ അധ്യക്ഷതയിൽ ചേരുന്ന യോഗത്തിൽ സംസ്ഥാന പ്രസിഡൻ്റ് തോമസ് കെ. തോമസ് എം.എൽ.എ. ക്യാമ്പ് ഉദ്ഘാടനം ചെയ്യും. വനം വകുപ്പ് മന്ത്രി എ.കെ. ശശീന്ദ്രൻ മുതിർന്ന നേതാക്കളെ ആദരിക്കും. സംസ്ഥാന വർക്കിംഗ് പ്രസിഡൻ്റ് പി.എം. സുരേഷ് ബാബു ‘വർത്തമാനകാല രാഷ്ട്രീയം’ എന്ന വിഷയത്തിലും, പി.കെ. രാജൻ മാസ്റ്റർ ‘ഇന്ത്യ 1946 മുതൽ 1948 വരെ’ എന്ന വിഷയത്തിലും ക്ലാസ്സെടുക്കും.
അഭിവാദ്യം ചെയ്യും
സമ്മേളനത്തെ അഭിവാദ്യം ചെയ്തുകൊണ്ട് സഹകരണ മന്ത്രി വി.എൻ. വാസവൻ, കേരളാ കോൺഗ്രസ് (എം) ചെയർമാൻ ജോസ് കെ. മാണി എം.പി. എന്നിവർ സംസാരിക്കും.
കേന്ദ്രത്തിലെ ബി.ജെ.പി. സർക്കാരിൻ്റെ കേരളത്തോടുള്ള അവഗണന സംസ്ഥാനത്തിൻ്റെ സാമ്പത്തിക മേഖലയെ പിന്നോട്ടടിക്കുമ്പോഴും, കഴിഞ്ഞ 9 വർഷത്തിലേറെയായി എൽ.ഡി.എഫ്. സർക്കാർ ജനങ്ങളെ ചേർത്തുപിടിച്ച് മുന്നോട്ട് പോകുകയാണെന്ന് എൻ.സി.പി. നേതൃത്വം അഭിപ്രായപ്പെട്ടു. എൽ.ഡി.എഫ്. സർക്കാരിൻ്റെ വികസന നേട്ടങ്ങൾ രാഷ്ട്രീയ എതിരാളികൾ പോലും അംഗീകരിക്കുന്നതായി നേതൃത്വം വിലയിരുത്തി. ജനവാസമേഖലയിൽ ഇറങ്ങുന്ന വന്യജീവികളെ വെടിവെച്ച് കൊല്ലുവാനുള്ള സംസ്ഥാന മന്ത്രിസഭയുടെ തീരുമാനത്തെ എൻ.സി.പി. അങ്ങേയറ്റം പ്രശംസിച്ചു. നവംബർ-ഡിസംബർ മാസങ്ങളിൽ നടക്കാനിരിക്കുന്ന തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിന് മുന്നോടിയായി നടക്കുന്ന ഈ ക്യാമ്പിൽ കോട്ടയം ജില്ലയിലെ തിരഞ്ഞെടുക്കപ്പെട്ട പ്രതിനിധികൾ പങ്കെടുക്കും.
