🗞🏵 പാലാ വിഷൻ ന്യൂസ് 🗞🏵
മാർച്ച് 20 , 2023 തിങ്കൾ 1198 മീനം 6
ന്യൂസ് ദിവസേന ലഭിക്കുവാൻ ഈ ലിങ്കിൽ ക്ലിക്ക് ചെയ്ത് ജോയിൻ ചെയ്യുക.
https://chat.whatsapp.com/LaaDUaR3VUGFfezf7dx3Em
🌺🌺🌺🌺🌺🌺🌺🌺🌺🌺🌺
വാർത്തകൾ
🗞🏵 മാർ ജോസഫ് പവ്വത്തിൽ പിതാവിൻ്റെ മൃതസംസ്കാര ശുശ്രൂഷകൾ മാർച്ച് 21, 22 ചൊവ്വ, ബുധൻ ദിവസങ്ങളിലായി സംസ്ഥാന സർക്കാരിൻ്റെ ഔദ്യോഗിക ബഹുമതികളോടെ നടത്തപ്പെടും.
ചൊവ്വ 7.00 am – അതിരൂപതാഭവനത്തിൽ വി. കുർബാന, മൃതസംസ്കാര ശുശ്രൂഷ ഒന്നാംഭാഗം
9.00 am – വിലാപയാത്ര സെൻട്രൽ ജംഗ്‌ഷൻ വഴി മാർക്കറ്റ് ചുറ്റി മെത്രാപ്പോലീത്തൻ പള്ളിയിലേയ്ക്ക്
11.00 am – പൊതുദർശനം
ബുധൻ 9. 30 am – മൃതസംസ്കാരശുശ്രൂഷ രണ്ടാംഭാഗം, വി. കുർബാന, നഗരി കാണിക്കൽ, സമാപനശുശ്രൂഷ, സംസ്കാരം എന്നിങ്ങനെ യാണ് സമയക്രമീകരണം.
🗞🏵 സംസ്ഥാനത്ത് പരക്കെ വേനല്‍ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ്. കണ്ണൂര്‍, കാസര്‍ഗോഡ് ഒഴികെയുള്ള 12 ജില്ലകളിലും നേരിയ വേനല്‍ മഴ പ്രതീക്ഷിക്കുന്നതായാണ് റിപ്പോര്‍ട്ട്. മലയോര മേഖലകളിലാണ് കൂടുതല്‍ മഴ സാധ്യത.
🗞🏵 തകർച്ച നേരിടുന്ന ക്രെഡിറ്റ് സ്വീസ് ബാങ്കിനെ ഏറ്റെടുത്ത് ബിസിനസ് വൈരികളായ യുബിഎസ്. അന്താരാഷ്ട്ര ബാങ്കിംഗ് മേഖലയിലെ തളർച്ച ഒഴിവാക്കാനായി സ്വിസ് സെൻട്രൽ ബാങ്കിന്‍റെ നിർദേശപ്രകാരമാണ് യുബിഎസ് ക്രെഡിറ്റ് സ്വീസിനെ ഏറ്റെടുത്തത്.
🗞🏵 ജപ്പാൻ – യുഎസ് സംയുക്ത സൈനിക പരിശീലനത്തിന് മറുപടി നൽകാനായി മിസൈൽ പരീക്ഷണം നടത്തി ഉത്തര കൊറിയ. ഞായറാഴ്ച രാത്രിയാണ് കൊറിയൻ കടലിടുക്കിലേക്ക് ഉത്തര കൊറിയ ഹ്രസ്വദൂര ബാലിസ്റ്റിക് മിസൈൽ വിക്ഷേപിച്ചത്.
🗞🏵 ഖലിസ്ഥാൻ അനുകൂലിയായ അമൃത്പാൽ സിംഗിനെതിരായ നടപടികളിൽ പ്രതിഷേധിച്ച ജനക്കൂട്ടം ലണ്ടനിലെ ഇന്ത്യൻ ഹൈക്കമീഷന്‍ ഓഫീസിന് മുന്പിൽ സ്ഥാപിച്ചിരുന്ന ദേശീയ പതാക അഴിച്ചുമാറ്റി. സംഭവമറിഞ്ഞയുടൻ കേന്ദ്ര സർക്കാർ ഡൽഹിയിലെ ബ്രിട്ടീഷ് വിദേശകാര്യവകുപ്പ് തലവനെ ഓഫീസിലേക്ക് വിളിപ്പിച്ച് ശക്തമായ പ്രതിഷേധമറിയിച്ചു.
🗞🏵 കർഷക സമരം അവസാനിപ്പിക്കുന്നതിന് കേന്ദ്രസർക്കാർ നൽകിയ വാഗ്ദാനങ്ങൾ പാലിക്കാത്തതിൽ കർഷകർ വീണ്ടും പ്രതിഷേധത്തിന്. കാർഷികോത്പന്നങ്ങൾക്ക് മിനിമം താങ്ങുവില ഉറപ്പാക്കുന്നത് ഉൾപെടെ കർഷകർ മുന്നോട്ടുവച്ച എട്ടിന ആവശ്യങ്ങളിൽ ഒന്നു പോലും കേന്ദ്രസർക്കാർ പാലിച്ചില്ലെന്ന് ചൂണ്ടിക്കാട്ടി ഡൽഹിയിലെ രാംലീല മൈതാനിയിൽ കർഷകർ തിങ്കളാഴ്ച പ്രതിഷേധിക്കും.
🗞🏵 റഷ്യന്‍ സൈന്യം കീഴടക്കിയ യുക്രെയ്ൻ തുറമുഖ നഗരമായ മരിയുപോളിൽ മിന്നൽ സന്ദർശനം നടത്തി പ്രസിഡന്‍റ് വ്ലാദിമിർ പുടിൻ. അന്താരാഷ്ട്ര ക്രിമിനൽ കോടതിയുടെ വാറണ്ടിന് പിന്നാലെയായിരുന്നു പുടിന്‍റെ മിന്നൽ സന്ദർശനം.
ശനിയാഴ്ച രാത്രിയോടെയാണ് പുടിൻ മരിയുപോളിൽ പറന്നിറങ്ങിയത്. ഹെലികോപ്ടറിൽ ഇവിടെയെത്തിയ റഷ്യൻ പ്രസിഡന്‍റ് നഗരത്തിലൂടെ കാർ ഓടിച്ചു. പ്രദേശവാസികളോട് അദ്ദേഹം സംസാരിക്കുകയും ചെയ്തു. ഇതിന്റെ വീഡിയോയും റഷ്യൻ വാർത്ത ഏജൻസി പുറത്തുവിട്ടു.
🗞🏵 ആലക്കോട്ട് നടന്ന കർഷക റാലിയിലെ തന്‍റെ പ്രസംഗം കർഷകരുടെ ദുരിതത്തിനു മുന്നിൽ ഉറച്ച നിലപാടുകളോടെ പറഞ്ഞതാണെന്ന് തലശേരി അതിരൂപത ആർച്ച്ബിഷപ് മാർ ജോസഫ് പാംപ്ലാനി. ഒരു മുന്നണിയുമായും സംഘർഷത്തിന്‌ താത്പര്യമില്ല. ഇടത്‌ സർക്കാരിൽ വിശ്വാസം പോയി എന്നും പറഞ്ഞിട്ടില്ല. കർഷകർക്കുവേണ്ടി സർക്കാർ ഒരുപാട്‌ കാര്യങ്ങൾ ചെയ്‌തിട്ടുണ്ട്‌. റബറിന്‌ വല വർധിപ്പിക്കാൻ സഹായിക്കുന്ന കക്ഷികളെ കർഷകർ സഹായിക്കും. അത് ബിജെപിയും സഭയും തമ്മിലുള്ള ബന്ധമായി കരുതണ്ട. രാഷ്‌ട്രീയലക്ഷ്യത്തോടെയല്ല പ്രസ്‌താവന നടത്തിയത്. കേന്ദ്രമോ സംസ്ഥാനമോ ആരു സഹായിച്ചാലും അവര്‍ക്കൊപ്പം നില്‍ക്കും. തന്‍റെ വാക്കുകളെ കത്തോലിക്കാ സഭയുടെ നിലപാടായി കാണേണ്ടതില്ലെന്നും റബര്‍ കര്‍ഷകരുടെ വികാരമാണ് താന്‍ പങ്കുവച്ചതെന്നും ആർച്ച് ബിഷപ് പറഞ്ഞു.
🗞🏵 വിവരാവകാശ പ്രകാരം അപേക്ഷകർക്ക് വിവരം നൽകുന്നതിൽ അശ്രദ്ധ കാട്ടിയ മൂന്ന് ഓഫീസർമാർക്ക് 37,500 രൂപ പിഴ ശിക്ഷ വിധിച്ച് വിവരാവകാശ കമ്മീഷൻ. ആലപ്പുഴ ജില്ലാ പഞ്ചായത്ത് എക്സിക്യൂട്ടീവ് എൻജിനിയർ എസ് ഡി രാജേഷ് 20,000 രൂപയും കോട്ടയം നഗരസഭ സൂപ്രണ്ട് ബോബി ചാക്കോ 15000 രൂപയും ചവറ ബ്ലോക്ക്പഞ്ചായത്ത് അസി. എക്സിക്യൂട്ടീവ് എൻജിനിയർ വി ലത 2500 രൂപയും പിഴയൊടുക്കാൻ സംസ്ഥാന വിവരാവകാശ കമ്മീഷണർ എ അബ്ദുൽ ഹക്കിം ഉത്തരവിട്ടു.
🗞🏵 സർഗ്ഗാത്മകതയുടെ പേരിലുള്ള ദുരുപയോഗം ഒരിക്കലും വച്ചു പൊറിപ്പിക്കാനാവില്ലെന്നും ഒടിടി പ്ലാറ്റ്‌ഫോമുകളില്‍ അസഭ്യ കണ്ടന്‍റുകള്‍ വർധിക്കുന്നുവെന്ന പരാതി ഗൗരവത്തോടെ കാണുന്നുവെന്നും വ്യക്തമാക്കി കേന്ദ്ര വാർത്താ വിതരണ മന്ത്രി അനുരാഗ് താക്കൂ‌ർ. നിയമത്തിൽ മാറ്റം വരുത്തേണ്ടതുണ്ടെങ്കിൽ നടപടിയെടുക്കുമെന്നും ക്രിയേറ്റിവിറ്റിയുടെ പേരിൽ എന്തും അനുവദിച്ചു നൽകാനാകില്ലെന്നും അദ്ദേഹം പറഞ്ഞു.
🗞🏵 ദേശീയ പുരുഷ കമ്മീഷന്‍ രൂപീകരിക്കണമെന്ന ആവശ്യവുമായി സുപ്രീം കോടതിയിൽ ഹർജി. ഗാര്‍ഹിക പീഡനം നേരിടുന്ന വിവാഹിതരായ പുരുഷന്മാര്‍ക്ക് വേണ്ടി ദേശീയ പുരുഷ കമ്മീഷന്‍ രൂപീകരിക്കണമെന്ന് ആവശ്യപ്പെട്ട് അഡ്വക്കേറ്റ് മഹേഷ് കുമാര്‍ തിവാരിയാണ് ഹര്‍ജി നല്‍കിയത്. 2021 ല്‍ ആത്മഹത്യ ചെയ്തതില്‍ 72 ശതമാനവും പുരുഷന്‍മാരാണെന്നും ഹര്‍ജിയില്‍ ചൂണ്ടിക്കാട്ടുന്നു. ആത്മഹത്യ തടയുന്നതിന് വേണ്ടിയുള്ള മാര്‍ഗനിര്‍ദേശങ്ങള്‍ പുറപ്പെടുവിക്കണമെന്നും അദ്ദേഹം ആവശ്യപ്പെട്ടു.
🗞🏵 ഭൂമി സംബന്ധമായ രേഖകൾ ഡിജിറ്റൽ വൽക്കരിക്കാനുള്ള നീക്കവുമായി കേന്ദ്രസർക്കാർ രംഗത്ത്. ഇതിന്റെ ഭാഗമായി ഭൂ- ആധാറിന് രൂപം നൽകാനാണ് കേന്ദ്രം പദ്ധതിയിടുന്നത്. ഗ്രാമ വികസനം ആൻഡ് പഞ്ചായത്ത് രാജ് മന്ത്രി ഗിരിരാജ് സിംഗാണ് ഇത് സംബന്ധിച്ച വിവരങ്ങൾ പുറത്തുവിട്ടത്. ഭൂ- ആധാർ അഥവാ യൂണിക് ലാൻഡ് പാർസൽ ഐഡന്റിഫിക്കേഷൻ നമ്പർ പദ്ധതി നടപ്പിലാക്കുന്നതോടെ, ഭൂമി ഇടപാടുകളിൽ സുതാര്യത വരുത്താനും, സാമ്പത്തികമായും സാമൂഹികപരമായും ജീവിത സാഹചര്യങ്ങൾ മെച്ചപ്പെടുത്താനും സാധിക്കുന്നതാണ്.
🗞🏵 ക്ലാസുകൾ ആരംഭിക്കേണ്ട തീയതിയെ കുറിച്ച് സ്കൂളുകൾക്ക് മുന്നറിയിപ്പ് നൽകി സിബിഎസ്ഇ. ഏപ്രിൽ ഒന്നിന് മുൻപ് ക്ലാസുകൾ ആരംഭിക്കരുതെന്നാണ് മുന്നറിയിപ്പ്. മുൻകൂട്ടി ക്ലാസുകൾ ആരംഭിക്കുന്നത് കുട്ടികളിൽ ആശങ്കയുണ്ടാക്കുന്നുവെന്ന വിലയിരുത്തലിനെ തുടർന്നാണ് മുന്നറിയിപ്പ്. പാഠഭാഗങ്ങൾ പൂർത്തിയാക്കുന്നതിനായി നേരത്തെ തന്നെ ക്ലാസുകൾ ആരംഭിച്ചുവെന്ന റിപ്പോർട്ട് ലഭിച്ചതിനെ തുടർന്നാണ് നിർദേശം.
🗞🏵 ഗതാഗത മേഖലയില്‍ തുടങ്ങി കായിക രംഗത്ത് വരെ കുറഞ്ഞ സമയം കൊണ്ട് രാജ്യം സുപ്രധാന നേട്ടങ്ങള്‍ കൈവരിച്ചെന്ന് പ്രധാനമന്ത്രി നരേന്ദ്ര മോദി. ചരിത്രപരമായ ഹരിത ബജറ്റിനാണ് രാജ്യം സാക്ഷ്യം വഹിച്ചത്. രണ്ടര മാസത്തിനുള്ളില്‍ വ്യോമയാന രംഗത്ത കുതിച്ചാട്ടമാണ് ഉണ്ടായത്. ഏഷ്യയിലെ ഏറ്റവും വലിയ അത്യധുനിക ഹെലികോപ്റ്റര്‍ ഫാക്ടറി തുംകുരുവില്‍ ആരംഭിച്ചു. അതുപൊലെ കര്‍ണാടകയിലെ ശിവമോഗയില്‍ വിമാനത്താവളം പ്രവര്‍ത്തനം തുടങ്ങി. ലോകത്തിലെ ഏറ്റവും വലിയ വ്യോമയാന ഓര്‍ഡര്‍ നല്‍കിയിരിക്കുകയാണ് എയര്‍ ഇന്ത്യ, നരേന്ദ്ര മോദി കൂട്ടിച്ചേര്‍ത്തു.
🗞🏵 മുൻ ബിഡിജെഎസ് നേതാവും റിലയൻസ് കമ്മ്യൂണിക്കേഷൻസ് കേരളത്തിലെ സിഇഒയുമായിരുന്ന വി ഗോപകുമാർ ആം ആദ്മി പാർട്ടിയിൽ ചേർന്നു. അദ്ദേഹത്തെ ആം ആദ്മി പാർട്ടിയിലേക്ക് സ്വാഗതം ചെയ്തത് ഡൽഹി മുഖ്യമന്ത്രിയും എഎപി ദേശീയ കൺവീനറുമായ അരവിന്ദ് കെജരിവാൾ ആണ്. ഗോപകുമാറിന്റെ പ്രവൃത്തി പരിചയം പാർട്ടിയുടെ കേരള ഘടകത്തിന്റെ മുന്നോട്ട് പോക്കിനെ സഹായിക്കുമെന്നും കെജ്‌രിവാൾ പറഞ്ഞു
🗞🏵 പീഡനത്തിനിരയായ പെണ്‍കുട്ടികള്‍ തങ്ങളുടെ ദുരവസ്ഥ നേരിട്ട് വന്ന് കണ്ട് അറിയിച്ചുവെന്ന രാഹുലിന്റെ കശ്മീരിലെ പ്രസംഗം വിവാദമായതോടെ വിവരങ്ങള്‍ ചോദിച്ചറിയാനായി രാഹുലിന്റെ ഡല്‍ഹിയിലെ വീട്ടിലേയ്ക്ക് പൊലീസ് എത്തി. എന്നാല്‍ പൊലീസ് രണ്ട് മണിക്കൂറോളം രാഹുലിന്റെ വീട്ടില്‍ ചെലവഴിച്ചെങ്കിലും അദ്ദേഹം പൊലീസിനെ കാണാന്‍ തയ്യാറായില്ല. പീഡനത്തിനിരയായ പെണ്‍കുട്ടികള്‍ തങ്ങളുടെ ദുരവസ്ഥ നേരിട്ട് വന്ന് കണ്ട് അറിയിച്ചുവെന്ന കശ്മീരിലെ പ്രസംഗത്തില്‍ വിശദീകരണം ആവശ്യപ്പെട്ടാണ് പൊലീസ് എത്തിയത്.
🗞🏵 ഗുജറാത്തിലെ മുന്ദ്രയിൽ ആരംഭിച്ച 34,900 കോടി രൂപയുടെ പെട്രോകെമിക്കൽ പദ്ധതി നിർത്തിവച്ചതായി അദാനി ഗ്രൂപ്പ്. കച്ച് ജില്ലയിൽ അദാനിയുടെ ഭൂമിയിൽ നിർമിക്കുന്ന മുന്ദ്ര പെട്രോകെം ലിമിറ്റഡിന്റെ കൽക്കരിയെ പിവിസി ആക്കി മാറ്റുന്ന പ്ലാന്റിന്റെ നിർമാണമാണ് നിർത്തിവച്ചത്.
ഇനിയൊരു അറിയിപ്പ് ഉണ്ടാകുന്നതുവരെ പദ്ധതിയുമായി ബന്ധപ്പെട്ട എല്ലാ പ്രവർത്തനങ്ങളും നിർത്തിവയ്ക്കാനാണ് നിർദേശം.
🗞🏵 കോഴിക്കോട് ഗവ. മെഡിക്കൽ കോളജ് ആശുപത്രിയിൽ ശസ്ത്രക്രിയയ്ക്കു വിധേയായ യുവതിയെ അറ്റൻഡർ പീഡിപ്പിച്ചു. പൊലീസ് കേസെടുത്തതിനെ തുടർന്ന് ഇയാൾ ഒളിവിലാണ്. ശനിയാഴ്ച രാവിലെ പ്രധാന ശസ്ത്രക്രിയ തിയറ്ററിൽ നിന്ന് ശസ്ത്രക്രിയയ്ക്കു ശേഷം യുവതിയെ സ്ത്രീകളുടെ സർജിക്കൽ ഐസിയുവിൽ പ്രവേശിപ്പിച്ച ശേഷമാണ് സംഭവം.
🗞🏵 ട്രക്കിൽ സ്വർണ്ണം കടത്താൻ ശ്രമിച്ച ബംഗ്ലാദേശ് പൗരൻ ബിഎസ്എഫിന്റെ പിടിയിൽ. 2.78 കോടി രൂപ വിലമതിക്കുന്ന 40 സ്വർണ്ണ ബിസ്‌ക്കറ്റുകളുമായി ബംഗ്ലാദേശ് സ്വദേശി സുശങ്കർ ദാസാണ് പിടിയിലായത്. ബിഎസ്എഫ് ഉദ്യോഗസ്ഥർക്ക് കിട്ടിയ വിവരത്തിന്റെ അടിസ്ഥാനത്തിൽ ഇന്ത്യ-ബംഗ്ലാദേശ് അതിർത്തിയിൽ നടത്തിയ പരിശോധനയിലാണ് സ്വർണ്ണം കടത്താൻ ശ്രമിച്ച ട്രക്ക് പിടികൂടിയത്.
🗞🏵 ആഗോള സ്വർണ ഇ.ടി.എഫുകളിലെ നിക്ഷേപം നിറം മങ്ങുമ്പോഴും, മുന്നേറ്റം തുടർന്ന് ഇന്ത്യ. ആഗോള തലത്തിൽ തുടർച്ചയായ പത്താം മാസമാണ് സ്വർണ ഇ.ടി.എഫുകളിലെ നിക്ഷേപം ഇടയുന്നത്. പണപ്പെരുപ്പം നിയന്ത്രണ വിധേയമാക്കാൻ അമേരിക്കൻ കേന്ദ്ര ബാങ്ക് സ്വീകരിച്ച നടപടി സ്വർണ ഇ.ടി.എഫുകളിലെ നിക്ഷേപത്തെ വൻ തോതിലാണ് ബാധിച്ചത്. അടിസ്ഥാന പലിശ നിരക്ക് കുത്തനെ കൂട്ടുകയും, ഡോളറിന്റെ മൂല്യവും ട്രഷറി ബോണ്ട് യീൽഡും കുതിച്ചുയരുകയും ചെയ്തതാണ് സ്വർണ ഇ.ടി.എഫുകളുടെ നിക്ഷേപത്തെ പ്രതികൂലമായി ബാധിക്കാൻ കാരണം.
🗞🏵 ബോളിവുഡ് താരം സല്‍മാന്‍ ഖാനെതിരെ ഭീഷണി ഉയര്‍ത്തി ജയിലില്‍ കഴിയുന്ന ഗുണ്ടാനേതാവ് ലോറന്‍സ് ബിഷ്ണോയി. ജയിലില്‍ ഇരുന്ന് ഒരു ടിവി ചാനലിന് നല്‍കിയ അഭിമുഖത്തിലാണ് ലോറന്‍സ് സല്‍മാന്‍ ഖാനെ ഭീഷണിപ്പെടുത്തിയത്. സല്‍മാന്റെ സുരക്ഷ നീക്കം ചെയ്യുന്ന ദിവസം സല്‍മാന്റെ ജീവിതത്തിലെ അവസാന ദിവസമായിരിക്കുമെന്നും ലോറന്‍സ് പറഞ്ഞു.
🗞🏵 കോൺഗ്രസിനെപ്പോലെ പ്രതിപക്ഷത്തിനെതിരെ കേന്ദ്ര ഏജന്‍സികളെ ഉപയോഗിക്കുന്ന ബിജെപിയും ദേശീയ രാഷ്ട്രീയത്തിൽ ഇല്ലാതാവുന്ന കാലം വിദൂരമല്ലെന്ന് സമാജ്‍വാദി പാര്‍ട്ടി അധ്യക്ഷന്‍ അഖിലേഷ് യാദവ്. കോണ്‍ഗ്രസും കേന്ദ്ര ഏജന്‍സികളെ ദുരുപയോഗം ചെയ്തിട്ടുണ്ടെന്ന് അഖിലേഷ് യാദവ് പറഞ്ഞു.‘തങ്ങള്‍ക്കെതിരെ നില്‍ക്കുന്നവരുടെ സമീപത്തേക്ക് ഇ.ഡിയെയും സിബിഐയെയും ഇന്‍കംടാക്സിനെയും അയക്കുന്നു. ഇതാണ് കോൺഗ്രസും ചെയ്തിരുന്നത്. ഇപ്പോൾ ബിജെപിയും അത് തന്നെയാണ് ചെയ്യുന്നത്
🗞🏵 കര്‍ണാടക നിയമസഭാ തെരഞ്ഞെടുപ്പില്‍ എന്ത് വിലകൊടുത്തും സീറ്റുകള്‍ പിടിച്ചടക്കാനുള്ള തന്ത്രങ്ങളുമായി രാഹുല്‍ ഗാന്ധി ബെംഗളൂരുവില്‍ എത്തി. മൂന്ന് ദിവസത്തെ സന്ദര്‍ശനത്തിനായാണ് പ്രചാരണത്തിന്റെ ഭാഗമായി കോണ്‍ഗ്രസ് മുന്‍ അധ്യക്ഷന്‍ രാഹുല്‍ ഗാന്ധി ബെംഗളൂരുവില്‍ എത്തിയിരിക്കുന്നത്.
🗞🏵 സഹകരണ സംഘത്തില്‍ ജോലി ലഭിക്കുമെന്ന് കരുതി പണം നല്‍കി തട്ടിപ്പിനിരയായ യുവാവിനെ ആത്മഹത്യ ചെയ്ത നിലയില്‍ കണ്ടെത്തി. തനിക്കും ഭാര്യയ്ക്കും ജോലി ലഭിക്കാന്‍ വേണ്ടിയാണ് പോത്തന്‍കോട് സ്വദേശി രജിത്ത് എട്ടു ലക്ഷത്തോളം രൂപ നല്‍കിയത്. ഞായറാഴ്ച ഉച്ചയ്ക്ക് 12 മണിയോടെ വീട്ടിലെ മുറിയ്ക്കുള്ളിൽ തൂങ്ങി മരിച്ച നിലയിൽ രജിത്തിനെ കണ്ടെത്തുകയായിരുന്നു. ആത്മഹത്യാ കുറിപ്പും കണ്ടെത്തിയിട്ടുണ്ട്.
🗞🏵 ഇടുക്കിയിലെ അരിക്കൊമ്പന്‍ എന്ന കാട്ടാനയെ പിടികൂടാനുള്ള ആദ്യ ദൗത്യസംഘം വയനാട്ടില്‍ നിന്നും പുറപ്പെട്ടു. വിക്രം എന്ന കുങ്കി ആനയുമായുള്ള സംഘമാണ് പുറപ്പെട്ടത്. വരും ദിവസങ്ങളിലായി കോന്നി സുരേന്ദ്രന്‍, കുഞ്ചു, സൂര്യന്‍ എന്നീ കുങ്കിയാനകളെയും മുത്തങ്ങയില്‍ നിന്നും കൊണ്ടുപോകും.
🗞🏵 കോഴിക്കോട് വിമാനത്താവളത്തിൽ 70 ലക്ഷം രൂപയുടെ സ്വർണം പിടികൂടി. മൂന്ന് പേരിൽനിന്നായാണ് 1.3 കിലോ സ്വർണം പിടികൂടിയത്. സംഭവുമായി ബന്ധപ്പെട്ട് മലപ്പുറം കെ.പുരം വെള്ളാടത്ത് ഷിഹാബ് (31), കാഞ്ഞങ്ങാട് ബേലികോത്ത് ഷാനവാസ് (26), കോഴിക്കോട് ശിവപുരം പറയരു കുന്നുമ്മേൽ അൻസൽ (32) എന്നിവരെ എയർ കസ്റ്റംസ് ഇന്‍റലിജൻസ് കസ്റ്റഡിയിലെടുത്തു.
🗞🏵 ഡൽഹി രാജ്യാന്തര വിമാനത്താവളത്തിൽ 1.5 കോടി രൂപയുടെ സ്വർണം പിടികൂടി. രണ്ട് യാത്രക്കാരിൽനിന്നായി 28 സ്വർണക്കട്ടികളാണ് പിടികൂടിയത്.ബാങ്കോക്കിൽനിന്നും സിംഗപ്പൂരിൽനിന്നും എത്തിയ വിമാനത്തിലെ യാത്രക്കാരാണ് സ്വർണം കടത്താൻ ശ്രമിച്ചത്.
🗞🏵 കണ്ണൂർ രാജ്യാന്തര വിമാനത്താവളത്തിൽ നിന്ന് 54.66 ലക്ഷം രൂപ വില വരുന്ന സ്വർണ്ണം പിടികൂടി. ദോഹയിൽ നിന്നെത്തിയ കാസർഗോഡ് കുമ്പള സ്വദേശി മുഹമ്മദിൽ നിന്നാണ് 930 ഗ്രാം സ്വർണം കസ്റ്റംസ് പിടികൂടിയത്. സ്വർണം പേസ്റ്റ് രൂപത്തിലാക്കി ശരീരത്തിനുള്ളിൽ ഒളിപ്പിച്ചാണ് പ്രതി കടത്താൻ ശ്രമിച്ചത്.
🗞🏵 ആലുവയില്‍ രണ്ടിടങ്ങളില്‍ നിന്നായി അജ്ഞാത മൃതദേഹങ്ങള്‍ കണ്ടെത്തി. ആലുവ പുഴയിൽ നിന്നാണ് ഒരു അജ്ഞാത മൃതദേഹം കണ്ടെത്തിയത്.ഹരിതവനം കടവിലാണ് 55 വയസ് തോന്നിക്കുന്നയാളുടെ മൃതദേഹം കണ്ടെത്തിയത്. മൃതദേഹം ജില്ലാ ആശുപത്രി മോർച്ചറിയിലേക്ക് മാറ്റി
🗞🏵 മലങ്കര സുറിയാനി കത്തോലിക്കാ സഭയുടെ കോട്ടയം സെന്റ് എഫ്രേം എക്യുമെനിക്കൽ റിസർച്ച് ഇൻസ്റ്റിട്യൂട്ടിന്റെ (SEERI) ഡയറക്ടറായ റവ. ഡോ. ജേക്കബ് തെക്കേപറമ്പിലിനെ വത്തിക്കാനിലുള്ള പൗരസ്ത്യ സഭാകാര്യാലയത്തിന്റെ ഭാഗമായ ആരാധനാക്രമത്തിനുവേണ്ടിയുള്ള പ്രത്യേക കമ്മീഷന്റെ കൺസൾട്ടന്റായി ഫ്രാൻസിസ് മാർപാപ്പ നിയമിച്ചു. കത്തോലിക്കാ സഭയുടെ കൂട്ടായ്മയിലുള്ള ഇരുപത്തിമൂന്ന് പൗരസ്ത്യ സഭകളുടെ ആരാധനക്രമ സംബന്ധമായ വിഷയങ്ങളിൽ തീരുമാനമെടുക്കുന്നതിന് പൗരസ്ത്യ തിരുസംഘം ഉപദേശം തേടുന്നത് ഈ കമ്മീഷനോടാണ്.
🗞🏵 മാർ ജോസഫ് പവ്വത്തിലിൻ്റെ നിര്യാണത്തെ തുടർന്ന് അടിയന്തിരമായി ചേർന്ന കുവൈറ്റിലെ സീറോ മലബാർ സഭ അംഗങ്ങളുടെ കൂട്ടായ്മയായ കുവൈറ്റ് കത്തോലിക്കാ കോൺഗ്രസിൻറെ മാനേജിംഗ് കമ്മിറ്റി യുടെ നേതൃത്വത്തിൽ നടന്ന യോഗം അദ്ദേഹത്തിൻറെ ആത്മശാന്തിക്ക് വേണ്ടി പ്രാർത്ഥനകൾ നേർന്ന് നിര്യാണത്തിൽ അഗാധമായ അനുശോചനം രേഖപ്പെടുത്തി. കുവൈത്ത് കത്തോലിക്കാ കോൺഗ്രസ് പ്രസിഡൻറ് ശ്രീ ആന്റോ കെ മാത്യു കുമ്പിളിമൂട്ടിലിൻ്റെ അധ്യക്ഷതയിൽ ചേർന്ന അടിയന്തര യോഗത്തിൽ കുവൈറ്റിലെ സഭാ സമൂഹത്തിന്റെ വിവിധ തുറകളിൽപ്പെട്ടവർ മാർ ജോസഫ് പവത്തിൽ പിതാവിനെ അനുസ്മരിച്ച് സംസാരിച്ചു.
