🗞🏵 പാലാ വിഷൻ ന്യൂസ് 🗞🏵
ഏപ്രിൽ 1, 2023 ശനി 1198 മീനം 18 ന്യൂസ് ദിവസേന ലഭിക്കുവാൻ ഈ ലിങ്കിൽ ക്ലിക്ക് ചെയ്ത് ജോയിൻ ചെയ്യുക.
https://chat.whatsapp.com/LaaDUaR3VUGFfezf7dx3Em
വാർത്തകൾ
🗞🏵 സംസ്ഥാനത്തെ കെട്ടിട നിർമാണ പെർമിറ്റ് ഫീസ് കുത്തനെ വർധിപ്പിച്ചു. നിർമാണ പെർമീറ്റ് ഫീസിനു പുറമേ അപേക്ഷാ ഫീസ്, സ്ക്രൂട്ട‌്‌നി ഫീസ് എന്നിവയും കൂട്ടിയിട്ടുണ്ട്. ഇതു സംബന്ധിച്ച് സംസ്ഥാന തദ്ദേശ വകുപ്പ് ഉത്തരവിറക്കി. പുതിയ നിരക്ക് ഏപ്രിൽ 10ന് പ്രാബല്യത്തിൽ വരുമെന്ന് ഉത്തരവിൽ പറയുന്നു..
🗞🏵 അട്ടപ്പാടിയിൽ വീണ്ടും കാട്ടാനക്കൂട്ടം. വെള്ളമാരി ഊരിനു സമീപമാണു കഴിഞ്ഞ ദിവസം രാത്രി കാട്ടാനക്കൂട്ടം ഇറങ്ങിയത്. സ്വകാര്യ റിസോർട്ടിനുള്ളിലൂടെ എട്ട് ആനകൾ നടക്കുന്ന ദൃശ്യം ലഭിച്ചിട്ടുണ്ട്.
കഴിഞ്ഞ ദിവസവും പ്രദേശത്ത് കാട്ടാന ഇറങ്ങിയിരുന്നു. ചിണ്ടക്കി ഊരിലും കാട്ടാന ആക്രമണം നടത്തി. ഒറ്റയാൻ ജീപ്പ് കുത്തി മറിച്ചിട്ടു. തലനാരിഴയ്ക്കാണ് ജീപ്പിലെ നാലു പേരും രക്ഷപ്പെട്ടത്.
🗞🏵 പാക്കിസ്ഥാനിലെ കറാച്ചിയിൽ റംസാൻ ആഘോഷങ്ങളോടനുബന്ധിച്ച് നടത്തിയ ഭക്ഷ്യവിതരണ പരിപാടിക്കിടെ തിക്കിലും തിരക്കിലും അകപ്പെട്ട് 11 പേർ മരിച്ചു. എട്ട് സ്ത്രീകളും മൂന്ന് കുട്ടികളുമാണ് മരിച്ചത്. നഗരപ്രാന്തത്തിലെ ഒരു ഫാക്ടറി‌യു‌ടെ ഉടമ പോലീസിനെ അറിയിക്കാതെ നടത്തിയ ഭക്ഷ്യവിതരണ പരിപാടിക്കിടെയാണ് അപകടം സംഭവിച്ചത്. ഭക്ഷ്യക്ഷ‍ാമം മൂലം രാജ്യത്ത് കടുത്ത പ്രതിസന്ധി അനുഭവപ്പെടുന്നതിനാൽ സാധനങ്ങൾ വാങ്ങാൻ വൻ തിരക്കാണ് അനുഭവപ്പെട്ടത്
🗞🏵 ആർഎസ്എസിനെ 21-ാം നൂറ്റാണ്ടിലെ കൗരവരെന്ന് വിശേഷിപ്പിച്ച കോൺഗ്രസ് നേതാവ് രാഹുൽ ഗാന്ധിക്കെതിരെ മാനനഷ്ടക്കേസ്. ആര്‍എസ്എസ് അനുഭാവിയായ കമൽ ഭണ്ഡോരിയയാണ് ഹരിദ്വാര്‍ കോടതിയില്‍ മാനനഷ്ടക്കേസ് ഫയല്‍ ചെയ്തത്.
🗞🏵 ക്രിമിനൽ വഞ്ചന, തട്ടിപ്പ് കുറ്റങ്ങൾ ഉൾപ്പെടെയുള്ള കേസുകൾ ഉപഭോക്തൃ ഫോറങ്ങൾ പരിശോധിക്കേണ്ടെന്ന് സുപ്രീംകോടതി. ദേശീയ ഉപഭോക്തൃ ഫോറത്തിന്റെ ഒരു വിധി റദ്ദാക്കിക്കൊണ്ടാണ് കഴിഞ്ഞദിവസം ജസ്റ്റീസുമാരായ അജയ് രസ്തോഗി, ബേല എം. ത്രിവേദി എന്നിവരുൾപ്പെട്ട ബെഞ്ച് ഇക്കാര്യം വ്യക്തമാക്കിയത്.
🗞🏵 സംസ്ഥാന സര്ക്കാരിന്റെ ജനദ്രോഹപരമായ നികുതികള്‍ പ്രാബല്യത്തില്‍ വരുന്ന സാഹചര്യത്തില്‍ ഏപ്രില്‍ ഒന്ന് യുഡിഎഫ് കരിദിനമായി ആചരിക്കുമെന്ന് കണ്‍വീനര്‍ എംഎം ഹസന്‍ പറഞ്ഞു. സംസ്ഥാനത്തെ എല്ലാ പഞ്ചായത്തിലും നഗരങ്ങളിലും യുഡിഎഫ് പ്രവര്‍ത്തകര്‍ കറുത്ത ബാഡ്ജ് ധരിക്കും. കരിങ്കൊടി ഉയര്‍ത്തിയും പന്തം കൊളുത്തിയും പ്രതിഷേധം അറിയിക്കുമെന്നും ഹസന്‍ വ്യക്തമാക്കി.
🗞🏵 സിപിഐഎം സംസ്ഥാന സെക്രട്ടറി എം.വി ഗോവിന്ദന്റെ മാനനഷ്ട നോട്ടീസിന് മറുപടി നല്‍കി സ്വപ്നാ സുരേഷ്. മാപ്പ് പറയാന്‍ താന്‍ ഉദ്ദേശിക്കുന്നില്ലെന്ന് വ്യക്തമാക്കിക്കൊണ്ടാണ് സ്വപ്നാ സുരേഷിന്റെ മറുപടി കത്ത്. പത്ത് ശതമാനം കോടതി ഫീസ് കെട്ടി എം വി ഗോവിന്ദന്‍ കേസിന് പോകുമോ എന്ന് കാത്തിരിക്കുന്നു എന്ന് കത്തിലൂടെ സ്വപ്ന സൂചിപ്പിച്ചു.
🗞🏵 ഐഎഎസ്, ഐപിഎസ് ഉദ്യോഗസ്ഥര്‍ സ്വകാര്യ സ്ഥാപനങ്ങളുടെ അവാര്‍ഡുകള്‍ വാങ്ങുന്നതിലെ ചട്ടം കര്‍ശനമാക്കി ചീഫ് സെക്രട്ടറി. ഉദ്യോഗസ്ഥര്‍ സംസ്ഥാന സര്ക്കാരിന്റെ അനുമതിയില്ലാതെ നേരിട്ട് അപേക്ഷകൾ നൽകി അവാര്‍ഡുകള്‍ വാങ്ങുന്നുവെന്നും ഇത് ഗുരുതര ചട്ടലംഘനമാണെന്നും ചീഫ് സെക്രട്ടറി ചൂണ്ടിക്കാട്ടി.
🗞🏵 പഞ്ചാബ് മുഖ്യമന്ത്രി ഭഗവന്ത് മാന്‍റെ മകള്‍ക്ക് അമേരിക്കയില്‍വച്ച് ഖലിസ്ഥാന്‍ വാദികളുടെ വധഭീഷണിയുണ്ടായെന്നും സുരക്ഷ ഉറപ്പാക്കണമെന്നും ഡല്‍ഹി വനിതാ കമ്മീഷന്‍ അധ്യക്ഷ സ്വാതി മലിവാള്‍. ട്വിറ്ററിലാണ് സ്വാതി ഇക്കാര്യം വെളിപ്പെടുത്തിയത്. ഭഗവന്ത് മാന്‍റെ മകള്‍ക്ക് വധഭീഷണി ഉണ്ടായതായുള്ള റിപ്പോര്‍ട്ടുകള്‍ ശ്രദ്ധയില്‍പെട്ടു. ഇത് അങ്ങയറ്റത്തെ ഭീരുത്വമാണ്. പെണ്‍കുട്ടിക്ക് സുരക്ഷ ഉറപ്പാക്കണമെന്ന് അമേരിക്കയിലെ ഇന്ത്യന്‍ എംബസിയോട് അഭ്യര്‍ഥിക്കുന്നതായും അവര്‍ ട്വിറ്ററില്‍ കുറിച്ചു.
🗞🏵 അനുമതിയില്ലാതെ സാങ്കേതിക സർവകലാശാല(കെടിയു) വൈസ് ചാൻസലർ സ്ഥാനം ഏറ്റെടുത്ത ഡോ. സിസ തോമസിനെതിരെ കുറ്റാരോപണ മെമ്മോയുമായി സർക്കാർ. ജോലിയിൽ നിന്ന് വിരമിക്കാനാ‌യി ഒരു മണിക്കൂർ മാത്രം ശേഷിക്കെയാണ് ഡോ. സിസ തോമസിനെത്തേടി ഉന്നത വിദ്യാഭ്യാസ വകുപ്പിന്‍റെ മെമ്മോ എത്തിയത്.
🗞🏵 സംസ്ഥാനത്തെ സ്വർണ വ്യാപാരികൾക്ക് ആശ്വാസം നൽകുന്ന വാർത്തയുമായി കേരള ഹൈക്കോടതി. സ്വർണ വ്യാപാരികളുടെ നിയമ പോരാട്ടങ്ങൾക്കൊടുവിൽ ആഭരണങ്ങളിൽ ഹാൾമാർക്കിംഗ് പതിപ്പിക്കാൻ 3 മാസത്തെ സാവകാശമാണ് ഹൈക്കോടതി നൽകിയിരിക്കുന്നത്. ഏപ്രിൽ ഒന്ന് മുതൽ പുതിയ ആറക്ക ആൽഫ ന്യൂമറിക് ഹാൾമാർക്ക് യൂണിക് ഐഡന്റിഫിക്കേഷൻ ഉള്ള സ്വർണാഭരണങ്ങൾ മാത്രമേ വിൽക്കാവൂ എന്ന് ബ്യൂറോ ഓഫ് ഇന്ത്യൻ സ്റ്റാൻഡേർഡ്സ് ഉത്തരവിറക്കിയിരുന്നു. ഈ ഉത്തരവാണ് ഹൈക്കോടതി 3 മാസത്തേക്ക് മരവിപ്പിച്ചിരിക്കുന്നത്. ഇതോടെ, സ്വർണ വ്യാപാരികൾക്ക് ആഭരണങ്ങളിൽ ഹാൾമാർക്കിംഗ് പതിപ്പിക്കാൻ 3 മാസത്തെ സാവകാശം കൂടി ലഭിക്കുന്നതാണ്. ഹൈക്കോടതിയുടെ ഈ തീരുമാനം രാജ്യമെമ്പാടും ബാധകമാണ്.
🗞🏵 സംസ്ഥാന സ്‌കൂൾ കലോത്സവ സ്വാഗതഗാനത്തിൽ മുസ്ലിം വേഷധാരിയെ തീവ്രവാദിയായി ചിത്രീകരിച്ചുവെന്ന പരാതിയിൽ ബന്ധപ്പട്ടവർക്കെതിരെ കേസെടുക്കാൻ കോടതി ഉത്തരവ്. പേരാമ്പ്ര മാതാ കേന്ദ്രം ഡയറക്ടർക്കും മറ്റുപത്തുപേർക്കുമെതിരെ കോടതി നിർദേശ പ്രകാരം നടക്കാവ് പോലീസ് കേസെടുത്തു. സ്വാഗത ഗാനം ഏറെ വിവാദമായിരുന്നു. ഗാനം വിവാദമാക്കിയത് മന്ത്രി മുഹമ്മദ് റിയാസ് ആണെന്ന് ‘വിവാദ ഗാനം’ അവതരിപ്പിച്ച പേരാമ്പ്ര മാതാ കലാകേന്ദ്രം ഡയറക്ടര്‍ കനകദാസ് ആരോപിച്ചിരുന്നു. ഇതിന്റെയെല്ലാം പിന്നാലെയാണ് നടപടി.
🗞🏵 ഗര്‍ഭിണികളായ സ്ത്രീകളെയും, കുട്ടികളെയും ക്രൂരമായ ശിക്ഷാരീതികള്‍ക്ക് വടക്കന്‍ കൊറിയ വിധേയരാക്കുന്നതായി റിപ്പോര്‍ട്ട്. ഇതുസംബന്ധിച്ചുള്ള വിവരങ്ങള്‍ ദക്ഷിണ കൊറിയന്‍ മന്ത്രാലയം പുറത്ത് വിട്ടു. ഗര്‍ഭിണിയായ സ്ത്രീയെ വധശിക്ഷയ്ക്ക് വിധേയയാക്കി എന്ന ഞെട്ടിപ്പിക്കുന്ന സംഭവവും റിപ്പോര്‍ട്ടിലുണ്ട്. യുവതി ഡാന്‍സ് ചെയ്യുന്ന വീഡിയോ അടുത്തിടെ രാജ്യത്ത് വ്യാപകമായി പ്രചരിച്ചിരുന്നു. കൊറിയന്‍ ഭരണാധികാരിയുടെ ചിത്രം വീഡിയോയില്‍ കാണാനായതാണ് അധികാരികളെ പ്രകോപിപ്പിച്ചത്. ഭിന്നശേഷിക്കാരായ ആളുകളെ നിര്‍ബന്ധിത വന്ധ്യംകരണത്തിന് വിധേയരാക്കുന്ന നടപടിയെ കുറിച്ചും റിപ്പോര്‍ട്ടില്‍ വിവരിക്കുന്നുണ്ട്.
🗞🏵 കർണാടകയിൽ വീണ്ടും ബിജെപി തന്നെ അധികാരത്തിലെത്തുമെന്ന് എഡ്യൂപ്രസ് ഗ്രൂപ്പ് നടത്തിയ അഭിപ്രായ സർവേ ഫലം. 110 മുതൽ 120 സീറ്റുകൾ വരെ ബിജെപി നേടുമെന്നാണ് സർവെ റിപ്പോർട്ട് വ്യക്തമാക്കുന്നത്. കോൺഗ്രസിന് 70 മുതൽ 80 സീറ്റുകൾ വരെ മാത്രമേ നേടാവനാകൂ എന്നും ഈ സർവെ റിപ്പോർട്ടിൽ പറയുന്നു. ജെഡിഎസിന് പരമാവധി 15 സീറ്റുകളും മറ്റുള്ളവർക്ക് നാല് മുതൽ 9 വരെ സീറ്റുകളുമാണ് എഡ്യൂപ്രസ് പ്രവചിക്കുന്നത്.
🗞🏵 സിദ്ദിഖ് കാപ്പൻ സമർപ്പിച്ച വിടുതൽ ഹർജി ലഖ്നൗ എൻഐഎ കോടതി മാറ്റി. ഏപ്രിൽ 11 ലേക്കാണ് മാറ്റിയത്. പ്രതിയാക്കിയ നടപടി റദ്ദാക്കണമെന്നാണ് സിദ്ദിഖ് കാപ്പൻ്റെ ആവശ്യം. 27 മാസം നീണ്ട ജയിൽവാസത്തിന് ശേഷമായിരുന്നു മാധ്യമപ്രവർത്തകൻ സിദ്ദിഖ് കാപ്പൻ ജയിൽ മോചിതനായത്. സുപ്രീം കോടതിയും അലഹബാദ് ഹൈക്കോടതിയും ജാമ്യം നൽകിയതോടെയാണ് കാപ്പന്റെ ജയിൽ മോചനത്തിന് വഴിയൊരുങ്ങിയത്.
🗞🏵 ഫ്രാന്‍സിസ് മാര്‍പാപ്പ വേഗത്തില്‍ സുഖം പ്രാപിക്കട്ടെയെന്ന് ആശംസിച്ച് പ്രധാനമന്ത്രി നരേന്ദ്രമോദി. ട്വിറ്ററിലൂടെയാണ് അദ്ദേഹം ഫ്രാന്‍സിസ് മാര്‍പാപ്പയ്ക്ക് രോഗസൗഖ്യം ആശംസിച്ചത്. ഫ്രാന്‍സിസ് മാര്‍പാപ്പയുടെ ആരോഗ്യത്തിനും വേഗത്തില്‍ സുഖം പ്രാപിക്കുന്നതിനും വേണ്ടി പ്രാര്‍ത്ഥിക്കുന്നുഎന്ന് പ്രധാനമന്ത്രി ട്വീറ്റ് ചെയ്തുഈ മണിക്കൂറുകളില്‍ ലഭിച്ച നിരവധി സന്ദേശങ്ങള്‍ എന്നെ വല്ലാതെ സ്പര്‍ശിക്കുന്നു, ഒപ്പം അടുപ്പത്തിനും പ്രാര്‍ത്ഥനയ്ക്കും ഞാന്‍ നന്ദി രേഖപ്പെടുത്തുന്നു എന്ന് ഫ്രാന്‍സിസ് മാര്‍പാപ്പയുടെ ട്വീറ്റ് പങ്കുവെച്ചുകൊണ്ടായിരുന്നു പ്രധാനമന്ത്രിയുടെ പ്രതികരണം.
🗞🏵 വന്ദേ ഭാരത് ട്രെയിനുകൾക്ക് നേരെ കല്ലെറിയുന്ന സംഭവം വർദ്ധിച്ചതോടെ കടുത്ത നടപടിയുമായി ദക്ഷിണ റെയിൽവേ. റിപ്പോർട്ടുകൾ പ്രകാരം, വന്ദേ ഭാരത് ട്രെയിനുകൾക്ക് നേരെ കല്ലെറിയുന്നവർക്ക് അഞ്ച് വർഷം വരെയാണ് തടവുശിക്ഷ ലഭിക്കുക. അടുത്തിടെ തെലങ്കാനയിൽ ട്രെയിനുകൾക്കു നേരെ കല്ലെറിഞ്ഞുണ്ടായ അക്രമ സംഭവങ്ങളുടെ പശ്ചാത്തലത്തിലാണ് ദക്ഷിണ റെയിൽവേ ശിക്ഷാ നടപടികൾ കടുപ്പിച്ചത്.
🗞🏵 ഡൽഹി മുഖ്യമന്ത്രി അരവിന്ദ് കേജ്രിവാളിന് പിഴ. 25000 രൂപയാണ് ഗുജറാത്ത് കോടതി പിഴ വിധിച്ചത്. പ്രധാനമന്ത്രിയുടെ നരേന്ദ്ര മോദിയുടെ ബിരുദ സർട്ടിഫിക്കറ്റ് തേടിയതിനാണ് പിഴ. മുഖ്യവിവരവകാശ കമ്മീഷൻ ഉത്തരവ് ഗുജറാത്ത് ഹൈക്കോടതി റദ്ദാക്കി.ഗുജറാത്ത് യൂണിവേഴ്‌സിറ്റി നല്‍കിയ അപ്പീല്‍ അനുവദിച്ചുകൊണ്ടാണ് ഹൈക്കോടതി ഉത്തരവ്.
🗞🏵 മധ്യപ്രദേശ് ഇൻഡോറിലെ ബെലേശ്വർ മഹാദേവ ക്ഷേത്രത്തിലെ പടിക്കിണർ ഇടിഞ്ഞുണ്ടായ അപകടത്തിലെ മരണസംഖ്യ 35 ആയി ഉയർന്നു. 18 ഓളം പേർ ആശുപത്രിയിൽ ചികിത്സയിലാണ്. ആർമി, എൻഡിആർഎഫ്, എസ്ഡിആർഎഫ് സംഘങ്ങളുടെ നേതൃത്വത്തിലാണ് ക്ഷേത്രത്തിൽ രക്ഷാപ്രവർത്തനം നടത്തുന്നത്. കൂടുതലാളുകൾ കിണറിനടിയിൽ കുടുങ്ങിക്കിടക്കുന്നുണ്ടോ എന്നറിയാൻ തെരച്ചിൽ ഊർജ്ജിതമാക്കിയിട്ടുണ്ട്.
🗞🏵 മദ്യവും ലഹരിമരുന്നും ഉപയോഗിക്കുന്നവര്‍ക്ക് അംഗത്വം കൊടുക്കില്ല എന്ന നിലപാടെടുക്കാന്‍ ഡിവൈഎഫ്ഐക്ക് സാധിക്കില്ലെന്ന് ഡിവൈഎഫ്ഐ സംസ്ഥാന സെക്രട്ടറി വി.കെ സനോജ്. അങ്ങനെയൊരു തീരുമാനം എടുക്കുന്നത് പ്രായോഗികമല്ലെന്നും സനോജ് ചൂണ്ടിക്കാട്ടി.
🗞🏵 കരിപ്പൂരില്‍ രണ്ടുകോടിയുടെ സ്വര്‍ണ വേട്ട. നാലുപേര്‍ പിടിയില്‍. കരിപ്പൂര്‍ വിമാനത്താവളം വഴി ശരീരത്തിനുള്ളിലും ഹാന്‍ഡ് ബാഗേജിനുള്ളിലും സോക്‌സിനുള്ളിലും ആയി ഒളിപ്പിച്ചു കടത്താൻ ശ്രമിച്ചത് ഏകദേശം 2 കോടി രൂപ വില മതിക്കുന്ന സ്വർണമാണ്. മൂന്നര കിലോഗ്രാമോളമാണ് ഇതിന്റെ തൂക്കം. നാലു വ്യത്യസ്ത കേസുകളിലായാണ് കോഴിക്കോട് എയര്‍ കസ്റ്റംസ് ഇന്റലിജന്‍സ് ഉദ്യോഗസ്ഥര്‍ ഈ സ്വർണം പിടികൂടിയത്.
🗞🏵 ഇടുക്കി കഞ്ഞിക്കുഴി പഞ്ചായത്തിലെ പുന്നയാറില്‍ ഒരു കുടുംബത്തിലെ അഞ്ചുപേര്‍ വിഷംകഴിച്ചു. പുന്നയാര്‍ സ്വദേശി കാരാടിയില്‍ ബിജു, ഭാര്യ ടിന്റു എന്നിവര്‍ മരിച്ചു. ഇവരുടെ മൂന്ന് കുട്ടികള്‍ ഗുരുതരാവസ്ഥയില്‍ ഇടുക്കി മെഡിക്കല്‍ കോളേജില്‍ ചികിത്സയിലാണ്. 11 വയസുള്ള പെണ്‍കുട്ടിയും, എട്ടും രണ്ടും വയസുള്ള ആണ്‍കുട്ടികളുമാണ് ആശുപത്രിയില്‍ കഴിയുന്നത്.
🗞🏵 ശ്വാസകോശത്തില്‍ അണുബാധയെ തുടര്‍ന്നു ആശുപത്രിയിൽ പ്രവേശിപ്പിച്ച ഫ്രാന്‍സിസ് പാപ്പയുടെ സൗഖ്യത്തിനായി പ്രാര്‍ത്ഥനയ്ക്കു ആഹ്വാനവുമായി അമേരിക്കന്‍ മെത്രാന്‍ സമിതി. പാപ്പ വേഗം സുഖം പ്രാപിക്കുന്നതിനായി പ്രാർത്ഥന അഭ്യര്‍ത്ഥിക്കുന്നതായും സാധിക്കുമെങ്കില്‍ ദിവ്യകാരുണ്യത്തിന്റെ മുന്‍പാകെ പ്രാര്‍ത്ഥിക്കണമെന്നും സഹോദര മെത്രാന്മാരോട് ചേര്‍ന്നു അഭ്യര്‍ത്ഥിക്കുകയാണെന്ന് അമേരിക്കന്‍ കത്തോലിക്ക മെത്രാന്‍ സമിതിയുടെ പ്രസിഡന്റ് ആർച്ച് ബിഷപ്പ് തിമോത്തി ബ്രോഗ്ലിയോ പറഞ്ഞു. പരിശുദ്ധ പിതാവിന്റെ വേഗത്തിലുള്ളതും പൂർണ്ണവുമായ സുഖം പ്രാപിക്കാൻ പ്രാർത്ഥിക്കുന്നതിന് അഭ്യർത്ഥിക്കുകയാണെന്ന് ചിക്കാഗോ രൂപതാദ്ധ്യക്ഷന്‍ കർദ്ദിനാൾ ബ്ലേസ് കുപ്പിച്ചും പറഞ്ഞു.
🗞🏵 നിക്കരാഗ്വേന്‍ ഏകാധിപത്യ ഭരണകൂടത്തിന്റെ ജനാധിപത്യവിരുദ്ധ നടപടികള്‍ക്കെതിരെ ശബ്ദമുയര്‍ത്തിയതിന് 26 വര്‍ഷത്തെ തടവുശിക്ഷക്ക് വിധിക്കപ്പെട്ട് ജയിലില്‍ കഴിയുന്ന മതഗല്‍പ്പ രൂപതാ മെത്രാന്‍ റോളണ്ടോ അല്‍വാരെസിന്റെ ആദ്യ ദൃശ്യങ്ങള്‍ പുറത്തുവിട്ടു. ഇളം നീലനിറമുള്ള വസ്ത്രം ധരിച്ച വിളറി, മെലിഞ്ഞ് കാണപ്പെട്ട മെത്രാന്‍ തന്റെ സഹോദരിക്കും, സഹോദരനുമൊപ്പം ലാ മൊഡേലോ ജയിലില്‍ ഭക്ഷണം കഴിക്കുന്നതിന്റെ ദൃശ്യങ്ങള്‍ മാര്‍ച്ച് 24-നാണ് നിക്കരാഗ്വേന്‍ ടെലിവിഷന്‍ പുറത്തുവിട്ടത്. ഇതോടെ മെത്രാന്‍ ജീവിച്ചിരിപ്പുണ്ടോ? എന്ന നിക്കരാഗ്വേന്‍ ജനതയുടെ ആശങ്കക്ക് അറുതിയായിരിക്കുകയാണ്. രാഷ്ട്രത്തിന്റെ അഖണ്ഡതക്ക് തുരങ്കംവെച്ചു, വ്യാജവിവരങ്ങള്‍ പ്രചരിപ്പിച്ചു തുടങ്ങിയ അനേകം വ്യാജ ആരോപണങ്ങളുടെ പേരിലാണ് ബിഷപ്പിനെ തടങ്കലിലാക്കിയത്.
🗞🏵 ശ്വാസകോശ അണുബാധയെ തുടര്‍ന്നു ആശുപത്രിയില്‍ പ്രവേശിപ്പിച്ച ഫ്രാന്‍സിസ് പാപ്പയുടെ ആരോഗ്യനിലയില്‍ കാര്യമായി പുരോഗതിയുണ്ടെന്നും ശനിയാഴ്ച ആശുപത്രി വിട്ടേക്കുമെന്നും വത്തിക്കാന്‍. ഇന്നലെ രാവിലെ നടന്ന പരിശോധനകളുടെ ഫലമായി, പാപ്പ നാളെ പേപ്പല്‍ വസതിയായ സാന്താ മാർത്തയിലേക്ക് മടങ്ങുമെന്ന് പ്രതീക്ഷിക്കുന്നുവെന്ന്‍ വത്തിക്കാൻ വക്താവ് മാറ്റിയോ ബ്രൂണി പറഞ്ഞു.
വാർത്തകൾക്കായി പാലാ വിഷന്റെ കമ്മ്യൂണിറ്റി ലിങ്ക്
https://chat.whatsapp.com/LaaDUaR3VUGFfezf7dx3Em
👉 visit our website pala.vision
