പാലാ: പ്രകൃതിഭംഗിയാൽ സമൃദ്ധമായ കടനാട് പള്ളിപ്പെരുന്നാളിന് മാറ്റ് കൂട്ടാൻ ഇത്തവണയും കുട്ടവഞ്ചി-വള്ളം സവാരികൾ ഒരുങ്ങുന്നു. പള്ളിക്കു അഭിമുഖമായുള്ള ചെക്കുഡാമിൽ ജനുവരി 14 മുതൽ സംഘടിപ്പിക്കുന്ന ജലമേളയുടെ ഉദ്ഘാടനം ജലവിഭവ വകുപ്പ് മന്ത്രി റോഷി അഗസ്റ്റിൻ നിർവ്വഹിക്കും. മാണി സി. കാപ്പൻ എം.എൽ.എ ചടങ്ങിൽ മുഖ്യാതിഥിയായിരിക്കും.
കഴിഞ്ഞ വർഷം കടനാട് പഞ്ചായത്തിന്റെ അനുമതിയോടെ കൈതക്കൽ പൂതക്കുഴി കുടിവെള്ള പദ്ധതിയുടെയും വ്യാപാരി വ്യവസായി ഏകോപന സമിതിയുടെയും നേതൃത്വത്തിൽ ആരംഭിച്ച ഈ സംരംഭം വൻ ജനശ്രദ്ധയാകർഷിച്ചിരുന്നു. ഒരേ സ്ഥലത്ത് തന്നെ കുട്ടവഞ്ചിയും വള്ളം സവാരിയും ആസ്വദിക്കാനുള്ള അപൂർവ്വ അവസരമാണ് ഇവിടെ ഒരുക്കിയിരിക്കുന്നത്. ജനുവരി 15 മുതൽ 20 വരെയാണ് പൊതുജനങ്ങൾക്ക് സവാരി നടത്താൻ സൗകര്യമുണ്ടാവുക.
സുരക്ഷയ്ക്ക് മുൻഗണന
ആയിരക്കണക്കിന് ആളുകൾ എത്തുന്ന പെരുന്നാൾ ആഘോഷത്തിന്റെ ഭാഗമായുള്ള ജലമേള ഇത്തവണ കൂടുതൽ സുരക്ഷാ സംവിധാനങ്ങളോടെയാണ് സംഘടിപ്പിക്കുന്നത്. പ്രായഭേദമന്യേ എല്ലാവർക്കും സുരക്ഷിതമായി സവാരി ആസ്വദിക്കാനുള്ള ക്രമീകരണങ്ങൾ പൂർത്തിയായതായി ഭാരവാഹികൾ പാലാ മീഡിയ അക്കാദമിയിൽ നടന്ന വാർത്താ സമ്മേളനത്തിൽ അറിയിച്ചു.
വാർത്താ സമ്മേളനത്തിൽ പങ്കെടുത്തവർ
കടനാട് പഞ്ചായത്ത് പ്രസിഡന്റ് ലാലി സണ്ണി, പഞ്ചായത്ത് മെമ്പർ ഉഷാ രാജു, സിബി അഴകൻപറമ്പിൽ, ടോണി അഴകൻപറമ്പിൽ, ബിനു വള്ളോംപുരയിടം, ടോമി അരീപ്പറമ്പിൽ എന്നിവർ വാർത്താ സമ്മേളനത്തിൽ പങ്കെടുത്തു. കടനാടിന്റെ വിനോദസഞ്ചാര സാധ്യതകൾക്ക് കൂടി ഈ ജലമേള കരുത്തേകുമെന്ന് ഭാരവാഹികൾ കൂട്ടിചേർത്തു.
