പാല: ഒക്ടോബർ 15-ാം തീയതി മുതൽ പാലാ മുൻസിപ്പൽ സ്റ്റേഡിയത്തിൽ നടന്നുകൊണ്ടിരുന്ന കോട്ടയം റവന്യൂ ജില്ലാ കായിക മേളയിൽ 170 പോയിൻ്റ് നേടി പാലാ സെൻ്റ്.തോമസ് ഹയർ സെക്കൻഡറി സ്കൂൾ ഓവറോൾ ചാമ്പ്യന്മാരായി. 23 സ്വർണ്ണം, 16 വെള്ളി 7 വെങ്കലം എന്നിങ്ങനെ 46 മെഡലുകൾ നേടിയാണ് പാലാ സെൻ്റ്.തോമസ് ചാമ്പ്യന്മാരായത്. വിജയികൾക്ക് ശ്രീ. ചാണ്ടി ഉമ്മൻ MLA ട്രോഫികൾ സമ്മാനിച്ചു.
കോട്ടയം ഡി.ഡി.ഇ. ശ്രീമതി. ഹണി , പാലാ എ.ഇ. ഒ സജി കെ. ബി. , പാലാ മുൻസിപ്പൽ ചെയർമാൻ ശ്രീ. തോമസ് പീറ്റർ, എന്നിവർ കായിക താരങ്ങൾക്കും കായികാദ്ധ്യാപകർക്കും സംസ്ഥാന മൽസരങ്ങളിൽ മികച്ച പ്രകടനം കാഴ്ച്ചവയ്ക്കാൻ ആശംസകൾ നേർന്നു. മേളയുടെ വിജയകരമായ നടത്തിപ്പിന് നേതൃത്വം വഹിച്ച കായികാദ്ധ്യാപകരെയും സ്പോർട്ട്സ്മാൻ സ്പിരിറ്റോടെ മൽസരങ്ങളിൽ പങ്കെടുത്ത കുട്ടികളെയും ചാമ്പ്യന്മാരായ പാലാ സെൻ്റ്.തോമസ് HSS ലെ വിദ്യാർത്ഥികളെയും അവർ അഭിനന്ദിച്ചു.
പാലാ സെൻ്റ്.തോമസിന് തിളക്കമാർന്ന വിജയം സമ്മാനിച്ച വിദ്യാർത്ഥികളെയും കായികാദ്ധ്യാപകൻ ശ്രീ. മനു പി.ജെയിംസിനെയും കോർപ്പറേറ്റ് സെക്രട്ടറി ഫാ. ജോർജ് പുല്ലുകാലായിൽ , മാനേജർ ഫാ. ജോസ് കാക്കല്ലിൽ, പ്രിൻസിപ്പൽ റെജിമോൻ കെ.മാത്യു, ഹെഡ്മാസ്റ്റർ ഫാ. റെജിമോൻ സ്കറിയ, പി.റ്റി.എ. പ്രസിഡൻ്റ് വി.എം. തോമസ് എന്നിവർ അഭിനന്ദിച്ചു. ഡോ. തങ്കച്ചൻ മാത്യുവിൻ്റെ പാലാ അൽഫോൻസിയൻ അത്ലറ്റിക് അക്കാദമിയുടേയും, ശ്രീ. സതീഷ് കുമാർ സാറിൻ്റെ പാലാ ജംബ്ബിംഗ് അക്കാദമിയുടെയും പരിശീലനമാണ് മികച്ച പ്രകടനം കാഴ്ച്ചവയ്ക്കുന്നതിന് കുട്ടികൾക്ക് സഹായകമായതെന്ന് പ്രിൻസിപ്പിൽ ശ്രീ. റെജിമോൻ കെ.മാത്യു പറഞ്ഞു.
93 പോയിൻ്റുമായി പൂഞ്ഞാർ എസ്.എം.വി. റണ്ണർ അപ്പായി. 42 പോയിൻ്റ് നേടി സെൻ്റ്. പീറ്റേഴ്സ് എച്ച്.എസ്. എസ്. കുറുമ്പനാടം മൂന്നാം സ്ഥാനത്തെത്തി.
