മുൻ ഐ.എ.എസ്. ഉദ്യോഗസ്ഥൻ കണ്ണൻ ഗോപിനാഥൻ കോൺഗ്രസ് പാർട്ടിയിൽ ചേർന്നു. ഡൽഹിയിലെ എ.ഐ.സി.സി. ആസ്ഥാനത്ത് എത്തിയാണ് അദ്ദേഹം അംഗത്വം സ്വീകരിച്ചത്.
ജമ്മു കശ്മീരിലെ ആർട്ടിക്കിൾ 370 റദ്ദാക്കിയതിൽ പ്രതിഷേധിച്ചാണ് 2019-ൽ കണ്ണൻ ഗോപിനാഥൻ സർവീസിൽ നിന്ന് രാജിവെച്ചത്. അഭിപ്രായ സ്വാതന്ത്ര്യത്തിന് പറ്റിയ ഇടമാണ് കോൺഗ്രസ് എന്ന് പാർട്ടിയിൽ ചേരുന്നതിന് മുമ്പ് അദ്ദേഹം പ്രതികരിച്ചു.
കശ്മീരിൻ്റെ പ്രത്യേക പദവി എടുത്തുകളഞ്ഞ സമയത്ത് കേന്ദ്ര സർക്കാർ നയങ്ങൾക്കെതിരെ അദ്ദേഹം രൂക്ഷ വിമർശനം ഉയർത്തിയിരുന്നു. കശ്മീരിലെ ജനങ്ങളുടെ ജനാധിപത്യ, ഭരണഘടനാ അവകാശങ്ങൾ ലംഘിക്കപ്പെടുന്നു എന്നും, രാജ്യത്തെ ഒരു പൗരൻ എന്ന നിലയിൽ തനിക്ക് നിശബ്ദനായിരിക്കാൻ കഴിയില്ലെന്നും അന്ന് അദ്ദേഹം തുറന്നടിച്ചിരുന്നു.
