കാവുംകണ്ടം : കാവുംകണ്ടം സെന്റ് മരിയ ഗോരെത്തി ഇടവകയിലെ കുടുംബ കൂട്ടായ്മ, സൺഡേസ്കൂൾ, വിവിധ ഭക്ത സംഘടനകൾ എന്നിവയുടെ നേതൃത്വത്തിൽ ഭക്ഷണപ്പൊതികൾ സമാഹരിച്ച് പാലാ മരിയ സദനത്തിന് കൈമാറി ജീവകാരുണ്യസ്ഥാപനങ്ങളുടെ മാതൃക മധ്യസ്ഥയായ വിശുദ്ധ മദർ തെരേസായുടെ തിരുനാളിനോട് അനുബന്ധിച്ചാണ് ഭക്ഷണ വിതരണം നടത്തിയത്. നാനുറ്റി അമ്പത്തോളം അന്തേവാസികൾക്ക് അഭയം നൽകുന്ന സ്ഥാപനമാണ് പാല മരിയ സദനം. വിവിധ സംഘടനകളും അഭ്യുദയകാംക്ഷികളും നൽകുന്ന സഹായമാണ് മരിയസദനത്തെ മുന്നോട്ടു നയിക്കുന്നത്. സന്തോഷിന്റെ നേതൃത്വത്തിൽ സേവന സന്നദ്ധരായ ഏതാനും പേർ ചേർന്നാണ് ഈ സ്ഥാപനം മുന്നോട്ട് നയിക്കുന്നത്. കോവിഡ് കാലത്തെ പ്രതിസന്ധിയും സാമ്പത്തിക തകർച്ചയും മരിയ സദനത്തെ സാരമായി ബാധിച്ചു. കാവുംകണ്ടം ഇടവകയിലെ എല്ലാ ഭക്തസംഘടനകളും ചേർന്ന് ‘പാഥേയം’ എന്ന പേരിൽ നടത്തിയ അന്നദാനത്തിന് ജാതിമത ഭേദമില്ലാതെ നല്ല സഹകരണം ലഭിച്ചു. വസ്ത്രം, പലചരക്കുസാധനങ്ങൾ, കാർഷികോൽപ്പന്നങ്ങൾ എന്നിവയും നൽകി. വികാരി ഫാ. സ്കറിയ വേകത്താനം, കൈക്കാരന്മാരായ ജോർജ് വല്യാത്ത്, ടോം കോഴിക്കോട്ട്,ബിജു കോഴിക്കോട്ട്, ഹെഡ് മാസ്റ്റർ സണ്ണി വാഴയിൽ, അഭിലാഷ് കോഴിക്കോട്ട്, ഡേവിസ്‌ കല്ലറക്കൽ, ലിസി ആമിക്കാട്ട്, ആര്യ പീടികയ്ക്കൽ, ജോയൽ ആമിക്കാട്ട് തുടങ്ങിയവർ പരിപാടികൾക്ക് നേതൃത്വം നൽകി.
