1480 ഒക്ടോബര് 1-നാണ് വിശുദ്ധ കജേറ്റന് ജനിച്ചത്. ഭാവിയില് പാപ്പായാകുവാനുള്ള ദൈവനിയോഗം ലഭിച്ചിരുന്ന പോള് നാലാമനൊപ്പം ക്ലര്ക്ക്സ് റെഗുലര് എന്ന സന്യാസീ സഭക്ക് രൂപം നല്കിയത് വിശുദ്ധ കജേറ്റനാണ്. ദൈവത്തോടുള്ള വിശ്വസ്തതയായിരുന്നു ആ സഭയുടെ അടിസ്ഥാന നിയമം. ആത്മാക്കളുടെ മോക്ഷത്തിനു വേണ്ടി വിശുദ്ധ കജേറ്റന് പ്രകടിപ്പിച്ചിരുന്ന ശക്തമായ തീവ്രാഭിലാഷം മൂലം “ആത്മാക്കളുടെ വേട്ടക്കാരന്” എന്നാണു വിശുദ്ധന് അറിയപ്പെട്ടിരുന്നത്. തിയാറ്റൈന്സ് (Congregation of Clerics Regular of the Divine Providence) എന്ന സന്യാസി സഭയുടെ സഹ-സ്ഥാപകനായിരുന്ന വിശുദ്ധന് യുവാവായിരിക്കുമ്പോള് തന്നെ ജൂലിയസ് രണ്ടാമന് പാപ്പായില് നിന്നും റോമില് സുപ്രധാനമായൊരു പദവി ലഭിച്ചു.
എന്നാല് 1516-ല് പൗരോഹിത്യ പട്ടം ലഭിച്ചതിനേ തുടര്ന്ന് വിശുദ്ധന് പാപ്പാ നല്കിയ പദവിയില് നിന്നും വിരമിച്ച് ദൈവസേവനത്തിനായി തന്നെത്തന്നെ സ്വയം സമര്പ്പിച്ചു. അത്യുത്സാഹത്തോടെ തന്നെ വിശുദ്ധന് ദൈവമക്കള്ക്കിടയില് സേവനം ചെയ്തു. അദ്ദേഹം തന്റെ സ്വന്തം കരങ്ങളാല് അനേകം രോഗികളെ പരിചരിക്കുക വരെയുണ്ടായി.
വിശ്വാസികളില് നിന്നും യാതൊരു തരത്തിലുള്ള പ്രതിഫലങ്ങളും സ്വീകരിക്കാതെ, ആളുകള് സ്വന്തം ഇഷ്ടപ്രകാരം എന്തു നല്കുന്നോ അത് കൊണ്ട് വേണമായിരിന്നു അവര്ക്ക് ജീവിക്കുവാന്. അതിനാല് തന്നെ ദൈവകാരുണ്യത്തില് അവര് അമിതമായി ആശ്രയിച്ചിരുന്നു. അതിയായ ദൈവഭക്തിയുണ്ടായിരുന്ന വിശുദ്ധ കജേറ്റന് പലപ്പോഴും ദിവസം എട്ട് മണിക്കൂറോളം പ്രാര്ത്ഥനയില് മുഴുകി കഴിയുമായിരുന്നു.
1527-ല് ചാള്സ് അഞ്ചാമന്റെ സൈന്യം റോം ആക്രമിച്ചു കൊള്ളയടിച്ചപ്പോള്, പാവങ്ങളെ സഹായിക്കുവാനായുള്ള ദേവാലയത്തിലെ പണം അവര്ക്ക് അടിയറവെക്കുവാന് വിസമ്മതിച്ചു എന്ന കാരണത്താല് പടയാളികള് വിശുദ്ധനെ ബന്ധനസ്ഥനാക്കി പീഡിപ്പിക്കുകയും തടവിലിടുകയും ചെയ്തു. ദുഃഖവും സങ്കടവും കൊണ്ട് പ്രക്ഷുബ്ദനായ വിശുദ്ധന് ക്രമേണ അസുഖം ബാധിച്ചു. 1547 ഓഗസ്റ്റ് 7ന് നേപ്പിള്സില് വെച്ചാണ് വിശുദ്ധ കജേറ്റന് അന്ത്യനിദ്ര പ്രാപിച്ചത്.
