പാലാ: തൃശ്ശൂർ അതിരൂപത ആർച്ച് ബിഷപ്പ് എമറിറ്റസ് മാർ ജേക്കബ് തൂങ്കുഴിയുടെ നിര്യാണത്തിൽ പാലാ രൂപത അഗാധമായ ദുഃഖം രേഖപ്പെടുത്തി. വിളക്കുമാടത്തിൽ ജനിച്ച ഉന്നത സഭാ നേതാക്കളിൽ ഒരാളായ ആർച്ച് ബിഷപ്പ് തൂങ്കുഴിയുടെ വേർപാട് സഭയ്ക്ക് വലിയ നഷ്ടമാണെന്ന് പാലാ രൂപത പ്രസ്താവനയിൽ അറിയിച്ചു.
അദ്ദേഹം സേവനമനുഷ്ഠിച്ച എല്ലാ ഇടങ്ങളിലും സൗമ്യനും ദയാലുവുമായ സാന്നിധ്യമായിരുന്നു. ഒരു ആത്മീയ നേതാവും ഒരു നിർമ്മാതാവായിട്ടാണ് അദ്ദേഹത്തെ സഭ ഓർക്കുന്നത്. മേരി മാതാ മേജർ സെമിനാരി, ജൂബിലി മിഷൻ മെഡിക്കൽ കോളേജ്, ജ്യോതി എഞ്ചിനീയറിംഗ് കോളേജ്, ക്രിസ്തു ദാസി സൊസൈറ്റി എന്നിവയുടെ സ്ഥാപകനാണ് മാർ ജേക്കബ് തൂങ്കുഴി.
തൃശ്ശൂർ, താമരശ്ശേരി, മാനന്തവാടി എന്നീ മൂന്ന് രൂപതകളിൽ നേതൃത്വം നൽകിയ അദ്ദേഹത്തിൻ്റെ ആത്മീയവും സാമൂഹികവുമായ സ്വാധീനം മായാത്തതാണ്. തൃശൂർ നഗരവും വിശ്വാസികളും അദ്ദേഹത്തെ തങ്ങളിലൊരാളായി സ്നേഹിക്കാൻ പഠിച്ചു. വളരെ നല്ല ഒരു ധ്യാനപ്രസംഗകൻ കൂടിയായിരുന്നു അദ്ദേഹം. പാലാ രൂപതയുടെ അനുശോചന സന്ദേശം രൂപതാ അധ്യക്ഷൻ മാർ ജോസഫ് കല്ലറങ്ങാട്ടും ബിഷപ്പ് ജോസഫ് പള്ളിക്കാപ്പറമ്പിലും ചേർന്ന് അറിയിച്ചു.
