പാലാ: ദളിത് സഹോദരങ്ങളുടെ ഉന്നമനത്തിനായി ജീവിതം സമർപ്പിച്ച വാഴ്ത്തപ്പെട്ട തേവർപറമ്പിൽ കുഞ്ഞച്ചൻ്റെ തിരുനാളിനോട് അനുബന്ധിച്ചുള്ള തീർത്ഥാടന വിളംബര ജാഥയ്ക്ക് പാലാ രൂപതയിൽ പ്രൗഢമായ തുടക്കമായി. കുഞ്ഞച്ചൻ്റെ യുഗപ്രഭാവമായ ജീവിത സന്ദേശം പൊതുസമൂഹത്തിലേക്ക് പകരുന്നതിൻ്റെ ഭാഗമായി ഇന്ന് (ഒക്ടോബർ 13) ജാഥാ പര്യടനം ആരംഭിച്ചു.
ഡി സി എം എസ് (DCMS) രൂപത സമിതിയുടെ നേതൃത്വത്തിൽ, ഒക്ടോബർ 13, 14 തീയതികളിലായി പാലാ രൂപതയിലെ എല്ലാ ഫൊറോനകളും കേന്ദ്രീകരിച്ചാണ് വിളംബര ജാഥ നടത്തുന്നത്.
പാലാ രൂപതാധ്യക്ഷൻ അഭിവന്ദ്യ ജോസഫ് കല്ലറങ്ങാട്ട് പിതാവ് ഉദ്ഘാടനം ചെയ്തു
തീർത്ഥാടന വിളംബര ജാഥയുടെ ഔപചാരിക ഉദ്ഘാടനം പാലാ രൂപതാധ്യക്ഷൻ അഭിവന്ദ്യ ജോസഫ് കല്ലറങ്ങാട്ട് പിതാവ് നിർവഹിച്ചു. പിന്നോക്ക വിഭാഗക്കാർക്കിടയിൽ കുഞ്ഞച്ചൻ നടത്തിയ നിസ്വാർത്ഥ സേവനങ്ങളെ ഓർമ്മപ്പെടുത്തിക്കൊണ്ട്, അദ്ദേഹത്തിൻ്റെ സ്നേഹ സന്ദേശം ഈ കാലഘട്ടത്തിൽ പകർത്തേണ്ടതിൻ്റെ പ്രാധാന്യം പിതാവ് ഉദ്ഘാടന പ്രസംഗത്തിൽ ഊന്നിപ്പറഞ്ഞു. ദളിത് സഹോദരങ്ങളെ സമൂഹത്തിൻ്റെ മുഖ്യധാരയിൽ എത്തിക്കാൻ കുഞ്ഞച്ചൻ നടത്തിയ അക്ഷീണ പരിശ്രമങ്ങളുടെ ഓർമ്മ പുതുക്കലാണ് ഈ വിളംബര ജാഥയുടെ പ്രധാന ലക്ഷ്യം.
വിളംബര ജാഥയ്ക്ക് മോൺ. ഡോ. സെബാസ്റ്റ്യൻ വേത്താനത്ത്, രൂപത ഡയറക്ടർ ഫാ. ജോസ് വടക്കേകുറ്റ്, അസി. ഡയറക്ടർ, ഫാ. മാണി കൊഴുപ്പൻകുറ്റി എന്നിവർ നേതൃത്വം നൽകുന്നു. ഡി സി എം എസ് രൂപത പ്രസിഡൻ്റ് ബിനോയ് ജോൺ, സെക്രട്ടറി ബിന്ദു ആൻ്റണി, മറ്റ് രൂപതാ സമിതി അംഗങ്ങൾ, സോണൽ കമ്മിറ്റി അംഗങ്ങൾ തുടങ്ങിയവരും ജാഥയുടെ വിവിധ കേന്ദ്രങ്ങളിലെ പര്യടനങ്ങൾക്ക് നേതൃത്വം നൽകുന്നു. വിശ്വാസികളുടെയും പൊതുജനങ്ങളുടെയും പങ്കാളിത്തം കൊണ്ട് വിളംബര ജാഥ ശ്രദ്ധേയമാവുകയാണ്.
